БІЛІМ БӘСЕКЕСІНДЕ БӘСІМІЗ ҚАЛАЙ?
Міне, тағы бір оқу жылы қол бұлғап артта қалды. Кейбірі үшін бұл кезекті жазғы демалыстың бастауы болса, мектеп түлектері үшін ұмытылмас сәт. Кеше ғана мектепке тарыдай болып кірген балақайлардың бойы өсіп, ой өрісі де кеңейген, ақылы толысқан. Мектеп өміріндегі қызықты сәттерін енді олар сағына еске алады. Білім нәрімен сусындатқан ұстаздардың ерен еңбегіне ризашылығын білдіреді.
Биылғы оқу жылында ауданда жалпы білім беретін орта мектепті 484 оқушы бітіреді. Қазіргі таңда 484 бітірушіден 413 оқушы ҰБТ-ға қатысады деп күтілуде. Дайындық жыл басынан жүйелі ұйымдастырылуда. Атап айтсақ, байқау сынағының нәтижесі қаңтар айында – 78 балл, ақпан айында – 82,4 балл, наурыз айында – 79,3 балл, сәуір айында – 81,1 балл болып отыр. Қазіргі таңда 26 бітіруші – «Алтын белгіге», 17 бітіруші – «Үздік аттестатқа» үміткер.
Жаңа қағида бойынша ҰБТ жылына төрт рет ұйымдастырылады. 15-20 қаңтар, 24-29 наурыз және 17-20 тамызда тестке қатысушы ақылы бөлімге түсетіндер және басқа мамандыққа ауысатындар үшін болса, 20 маусым – 5 шілде аралығында ағымдағы жылы және өткен жылғы мектеп, колледж бітіруші түлектері үшін тегін және гранттық оқу жүйесіне түсу үшін өткізіледі.
Мектеп бітірушіден ҰБТ-ға қатысуға өтініш 10 наурыз – 10 мамыр аралығында қабылданып, ал өткізу 20 маусым мен 5 шілде аралығында ҰТО арқылы ақысыз ұйымдастырылады. ҰБТ форматы бойынша 5 пән. Оның үшеуі міндетті және талапкердің мамандығына байланысты бейіні бойынша 2 пән таңдайды.
ҰБТ сынағынан соң жылда дәстүрге айналған мектеп бітіруші түлектердің банкет кеші бар. Мектеп бітіру кешінің әр оқушы мен ата-ана үшін орны бөлек. Әрине, ұрпағының алдында қашанда жауапкершілікті сезінетін ата-анаға перзентінің мектеп бітірердегі "соңғы қоңырауынан" бастап, бітіру кешіне дейін қатарынан қалмай қатыстыру оңайға соқпайтыны, қалтаға салмақ салатыны да бар. Соңғы қоңырауда мектеп түлектерінің киімі, бітіру кеші алдында серуендейтін кортеж, банкет бәрі түптеп келгенде қалта қағатын қаражатқа тіреледі.
Дегенмен, бес саусақ бірдей емес. Бірінің жағдайы келсе, екіншісінікі келіңкіремейді. Әйтеуір баламның жүзі сынық болмасын, қатарынан қалмасын деген оймен қарызданып болса да қаражат тауып береді. Сонымен біркүндік кешке қыруар ақша жұмсалады. Оған жүрегі алып ұшқан жас түлектің қауіпсіздігін тағы қосыңыз.
Ал биыл ҚР Білім және ғылым министрі Күләш Шамшидинова осы мәселеге оңтайлы пікір айтқан еді.
– Бұл мәселе жыл сайын көтеріледі. Бұрыннан келе жатқан жақсы бір дәстүр бар: түлектердің кештері мектеп аумағында өтеді. Онда мұғалім мен оқушы, түлектер арасында шынайы, емен-жарқын әңгіме болады. Бірақ, өкінішке қарай, соңғы кезде мектеп бітіру кештері бәсекеге айналды, – деген болатын білім және ғылым министрі үкімет үйінде өткен баспасөз мәслихатында.
Министр сөзі еленбей қалған жоқ. Қазір еліміздің барлық өңірлерінде 11-сынып оқушылары бітіру кеші мен серуен кортежінен өз еріктерімен бас тартып оны әлеуметтік желіге жүктеп, өздерінен кейінгі сыныптарға эстафета есебінде жолдап жатыр. Біздің аудан мектептері де бұл эстафетаны қолдауда. Мәселен ауданға қарасты барлық мектеп түлектері осы бітіру кешінен өз еріктерімен бас тартып бейне түсіруде.
– Иә, бұл істі қолдаймын. Қыз бала болған соң көйлегіміздің өзі қымбат тұрады. Бет әрлеп, шаш үлгісін де жасатуға тура келеді. Бұл ата-ананың қалтасына да үлкен салмақ түсіреді. Олардың күні-түні еңбек етіп тапқан ақшасын босқа шашқан есеп боламыз ғой. Сондықтан барлық аудан мектебінің оқушыларын осы эстафетаға қатысуға шақырамын, – дейді 11-сынып оқушысы Айдана Рахметова.
Түйін.
Міне, жастар жылында мектеп түлектері осындай игі шараны қолға алып жатыр. Әрине, бұл көңіл қуантарлық іс. Тек мұның нәтижелі болғанын қалаймыз. Иә, мектеп бітіруші түлек үшін соңғы қоңырау соғылды. Келесі кезекте маңызды сынақ күтіп тұр. Ол, әрине ҰБТ сынағы. Мұнда бірі – бағына, бірі – біліміне, енді бірі асқақ арманына сенеді. Біз де түлектердің осы өмір баспалдағынан сүрінбей өтуіне тілекшіміз.
Ақнұр САҒЫНТАЙ,
«Қармақшы таңы».
