ШЕКАРАШЫЛАР САПҚА ТҰРДЫ

Елдің шетінде, желдің өтінде тұрып ұланғайыр жерімізді қызғыштай қорғап, халық тыныштығын қамтамасыз ету  – шекара қызметінің басты міндеті. Бұл кез келгеннің қолынан келе бермейтін қиын қызмет. Аудандағы Қуаңдария ауылында «Қосшың» шекара заставасы ел тыныштығын қорғауда үздіксіз жұмыс істеуде. Жуырда аталған шекара заставасының майоры Әлібек Райымбаевтың ұйымдастыруымен қарулы күштер қатарында қызмет еткен және оның сапында жүрген ержүрек азаматтарға арналған мерекелік шара өтті.

Кеште шекара комендатурасының штаб бастығы капитан Данияр Саятұлы жеке құрамды сапқа тұрғызып,  ел тыныштығын қорғап жүрген азаматтарды құттықтап, өз ризашылығын білдірді. Ауыл әкімі Рустам Ефенов шекара қызметкерлеріне тәуелсіз еліміздің айбынын асқақтатып, абыройын арттыра түсетін мерейлі күндердің көп болуына тілек білдірді.

Шарада қызметтік иттің көмегімен, мемлекеттік шекара бұзушыны ұстаудың әдіс-тәсілі көрсетілді. Кеш соңы ауылдық клуб үйі қызметкерлері дайындаған мерекелік концертке ұласты.

Ақнұр САҒЫНТАЙ,

«Қармақшы таңы».