НҰРОТАНДЫҚТАР САПАНЫ БАҚЫЛАЙДЫ

Міне, Елбасының осындай игі бас­тамасына «Нұр Отан» партиясы да өз үлесін қосуда. Бұл бағытта нұр­отандықтар «Мектептердегі спорт алаңдарын салу немесе қайта салу» партиялық жобасы аясында білім беру мекемелеріне арнайы бақылау жүргізуде. Оған айғақ, жуырда партиялық топ Жосалы кенті мектептерінде болып, онда та­қырып аясында атқарылып жатқан жұмыс­тармен танысты.– «Нұр Отан» партиясы арнайы жобаны қолға алды. Бұл – өзекті мәселе. Себебі, «Спорт – денсаулық кепілі» десек, балаларымыздың дені сау ұрпақ болып қалыптасуы үшін алдымен мектептердегі спорт алаңдарының жай-күйі бізді алаңдатады. Бұл инфрақұрылымды балалар ғана емес, ересектер де тиімді пайдалануы тиіс. Сонымен қатар, «Денсаулық сабақтары» атты тағы бір партиялық жоба енгізілетінін де атап өткен жөн. Бастауыш сыныптар үшін тәрбие са­ғаттары, тренингтер, саламатты өмір салтын насихаттайтын сыныптан тыс сабақтар да бала тәрбиесіне тиімді болу қажет. Сондықтан біз жобаны мемлекеттік-жеке меншік әріптестік механизмінің аясында жүзеге асыруға жұмыла жұмыс істеп, бұл жобаны партиялық бақылауда ұстауға тиіспіз, – деді «Нұр Отан» партиясы аудандық филиалы төрағасының бірінші орынбасары Дастан Буханов.