ӘДІЛЕТ КЕҢЕС БЕРЕДІ
Партияның 2015-2025 жылдарға арналған сыбайлас жемқорлыққа қарсы күрес бағдарламасын жүзеге асыруда «Нұр Отан» партиясы аудандық филиалы, Қармақшы аудандық Әділет басқармасымен бірлесіп, аудандық партия филиалында, амбулаториялық-емханалық қызметі бар Қармақшы аудандық орталық ауруханасында, Халыққа қызмет көрсету орталығында «Әділет кеңес береді» акциясы мен көшпелі қоғамдық қабылдау болып өтті. Тұрғындарға кәсіби заңгерлік көмек көрсету, құқықтық нормалар мен қолданыстағы заңдылықтар мен оларға енгізілген өзгерістер туралы ақпараттар және тұрғындардың сауалдарына жауап беру мақсатында «Нұр Отан» партиясы Қармақшы аудандық филиалы төрағасының бірінші орынбасары Д.Буханов, аудандық Әділет басқармасының басшысы Н.Асанова, аудандық жұмыспен қамту әлеуметтік бағдарламалар және азаматтық хал актілерін тіркеу бөлімінің жетекші маманы Ғ.Кенжеғұлов, Халыққа қызмет көрсету орталығының басшысы Ә.Сағатов және орталық инспекторлары, аудандық орталық емхананың қызметкерлері, партия қызметкерлері, кент тұрғындары қатысты. Қабылдау барысында тұрғындардың жұмысқа орналасу, балалар жәрдемақысы жөнінде сұрақтарына әділет органы құқықтық кеңестері мен тұщымды жауаптарын беріп, мәселенің оң шешілуіне ықпал жасалатыны айтылды.
