Есірткісіз болашақ – қоғам үні
«Адамнан бәрін тартып алуға болады, тек бір нәрседен басқа: кез келген жағдайда өз көзқарасын таңдау еркіндігінен».
Виктор Франкл
Қазіргі қоғамның алдында тұрған күрделі әлеуметтік мәселелердің бірі – есірткіге тәуелділіктің алдын алу. Есірткі заттарын қолдану адамның орталық жүйке жүйесіне кері әсер етіп, психикалық және физикалық денсаулығының бұзылуына әкеледі. Оның салдары жеке адамның өмірімен шектелмей, отбасы институтына, қоғамдық қауіпсіздікке және елдің әлеуметтік дамуына да ықпал етеді. Сондықтан есірткімен күрес – тек құқықтық шаралар жиынтығы емес, ұлт болашағын қорғауға бағытталған маңызды қоғамдық міндет.
Менің ойымша, есірткі мәселесін шешудің ең тиімді жолы – оның салдарымен күресуден бұрын, алдын алу мәдениетін қалыптастыру. Себебі ақпараттандырылған, сыни ойлайтын және өз әрекетіне жауап бере алатын тұлға зиянды әдеттерге қарсы саналы таңдау жасайды. Осы бағытта отбасылық тәрбие, сапалы білім, психологиялық қолдау және жастардың әлеуметтік белсенділігін арттыру ерекше маңызға ие.
Сонымен қатар салауатты өмір салтын насихаттау науқандық сипатта қалмай, күнделікті қоғамдық құндылыққа айналуы тиіс. Спорт, ғылым, өнер мен білім – жастардың әлеуетін жүзеге асыратын маңызды мүмкіндіктер.
Мен есірткісіз болашақты қалыптастыру әр азаматтың азаматтық жауапкершілігінен басталатынына сенімдімін. Өйткені қоғамның үні – оның іс-әрекетінде. Дені сау ұрпақ – тәуелсіз елдің ең басты капиталы!
Тобаева Жанерке,
№ 272 мектеп оқушысы
