Қазіргі таңда әлемнің жер-жерінде діни ахуал ең өзекті әрі өміршең мәселенің бірі. Қай жерде болмасын кеңінен етек жайған кертартпа, теріс пиғылды деңгейдегі діни ағымдар қарапайым халық пен қоғам арасына іріткі салып, ел-жұрттың тыныштығы мен берекесін қашыруда. Әсіресе, мұндай жат діни ағымдар өзінің айласын қанаты қатаймаған жастар қауымына бағыттап, олардың сана-сезімін улау арқылы өз қатарына тартуда.
Осы тақырып аясында аудандық ардагерлер кеңесінің төрағасы Қаршыға Есдәулетов пен облыстық дін істерін зерттеу орталығы аудандық бөлімшесінің меңгерушісі, теолог Жалғасбек Ысқақов аудан тұрғындарына жат ағымның жетегіне кетпеу мақсатында ауданның барлық өңірінде болып, үгіт-насихат жұмыстарын жүргізді. Кезекті жиын Жосалы кентінде жалғасты. Шараға ауданның бас имамы Асхат Жарқынбеков пен басқа да дін өкілдері, сонымен қатар аудандық ата-аналар кеңесінің төрағасы Сұлтанбек Мырзабаевтар да қатысты. Жиынға қатысушылар өз ойын ортаға салып, қоғамның дерті туралы толығырақ айтты.
- Елдегі бүгінгі діни ахуал қоғамымыздың ең өзекті мәселесі. Жат ағым өкілдері ауданымызда да кездесуде. Ең әуелі сақтықты баладан бастауымыз қажет. Телофонға телміртіп отырғызып қоямыз, не көріп, біліп жатқанында шаруамыз жоқ. Баланың санасы таза, сөзге ергіш, сондықтан абай болуымыз қажет,- деді Ж.Ысқақов. Сонымен бірге, жиында көптеген уағыз, әсерлі әңгімелер мен пікірлер айтылды.