ЖЫЛЫТУ МАУСЫМЫНА ДАЙЫНДЫҚ – ҚАУІПСІЗДІК КЕПІЛІ

Қазіргі таңда аудан тұрғындарының бір бөлігі үйлерін газбен жылыту жүйесін пайдаланады. Газ құрылғыларын пайдалану кезінде қауіпсіздік талаптарын қатаң сақтау маңызды. Газ жабдықтарын өз бетінше жөндеуге немесе қайта орнатуға болмайды. Құрылғыларды тек тиісті мамандарға тексертіп, техникалық жағдайын бақылауда ұстаған жөн.

Газ құрылғысын пайдаланар алдында оның жарамдылығына көз жеткізу қажет. Газ плитасын немесе жылыту қазандығын қараусыз қалдыруға болмайды. Үй-жайды тұрақты түрде желдетіп, газдың толық жануына қажетті ауа алмасуды қамтамасыз ету керек.

Газдың иісі сезілген жағдайда сабыр сақтап, электр жарығын қосуға немесе өшіруге, сіріңке жағуға және ашық от пайдалануға болмайды. Мүмкіндігінше газ кранын жауып, терезе мен есіктерді ашып, үйден шығу қажет. Одан кейін қауіпсіз жерден 104 газ авариялық қызметіне немесе 112 бірыңғай жедел қызмет нөміріне хабарласқан дұрыс.

Сонымен қатар үйді жылыту мақсатында газ плитасын пайдалануға болмайды. Газ құрылғысының жанында тез тұтанатын заттарды сақтамау қажет. Балаларды газ жабдықтарына жақындатпай, олардың газ құрылғыларын өз бетінше пайдалануына жол бермеу керек.

Пешпен жылытылатын үйлерде жылыту маусымы басталғанға дейін пеш пен мұржаның жағдайын тексеріп, мұржаны күйеден тазалау қажет. Пеште жарықшақтар мен басқа да ақаулар болса, оларды уақытылы жөндеген жөн. Пешті жағу кезінде бензин, керосин және басқа да тез тұтанатын сұйықтықтарды пайдалануға болмайды.

Электр жылытқыштарын пайдаланғанда техникалық жағдайы белгісіз немесе қолдан жасалған құрылғылардан бас тарту қажет. Бір розеткаға бірнеше қуатты электр құралын қатар қоспау, бүлінген электр сымдарын пайдаланбау керек.

Жылыту маусымында тұрғындар өрт қауіпсіздігімен қатар, улы газдан уланудың алдын алу шараларына да назар аударуы тиіс. Мұржаның тартуын бақылап, бөлмелерді желдетіп отырған жөн. Улы газдың қауіптілігі – оның түсі мен иісінің болмауында. Сондықтан қауіпсіздік талаптарын алдын ала сақтау өте маңызды. Балалардың қауіпсіздігі де назардан тыс қалмауы керек. Сіріңке, оттық, газ құрылғылары және жылыту құралдары балалардың қолы жетпейтін жерде болғаны дұрыс.

Жылыту маусымына алдын ала дайындалып, қауіпсіздік талаптарын сақтау – әр отбасының амандығының кепілі. Қарапайым ережелерді орындау арқылы өрттің, газдан уланудың және басқа да төтенше жағдайлардың алдын алуға болады. Өрт немесе төтенше жағдай орын алған жағдайда дереу 101 немесе 112 нөміріне хабарлаңыз. Газдың авариялық жағдайында 104 нөміріне қоңырау шалыңыз.

Қауіпсіз жылыту маусымы – өз қолымызда!