Терезе қауіпсіздігі – бала өмірінің кепілі

Жыл сайын жаз мезгілінде балалардың терезеден құлап кету жағдайлары жиілейді. Мұндай қайғылы оқиғалардың басты себептері – балаларды қараусыз қалдыру және терезенің қауіпсіздік талаптарына сай жабдықталмауы. Көп жағдайда кішкентай балалар терезе алдындағы жиһазға шығып, москит торына сүйенеді. Алайда москит торы баланың салмағын көтермейді. Соның салдарынан бала биіктіктен құлап, ауыр жарақат алуы немесе өміріне қауіп төнуі мүмкін.
Осыған байланысты ата-аналар мен тұрғындарға төмендегі қауіпсіздік шараларын сақтау ұсынылады. Ең бірінші балаларды үйде жалғыз қалдырмау, одан кейін терезе алдына жиһаз қоймау, терезелерге арнайы қорғаныш бекіткіштер орнату, москит торына сенбеу керек. Сонымен қатар баланы әрдайым бақылауда ұстаған жөн.
Аудандық төтенше жағдайлар бөлімі тұрғындарды балалар қауіпсіздігіне бейжай қарамауға шақырады. Әрбір ата-ана қарапайым қауіпсіздік ережелерін сақтау арқылы қайғылы жағдайлардың алдын ала алады. Балалардың өмірі мен қауіпсіздігі – баршамыздың ортақ міндетіміз