Балаға терезеден төнген қауіп

 Терезеден құлау салдарынан Қазақстанда жыл сайын орта есеппен  10 бала көз жұмады екен. Ағымдағы жылдың 5 айында облысымызда өкінішке орай 6 бала көз жұмды. Көп жағдайда 2 жастан 7 жасқа дейінгі балалар терезеден құлау қауіп-қатеріне жиі ұшырайды, бұл жастағы балалар терезе алдында ойнаудың қаншалықты қауіпті екенін түсінетін жаста емес. Көп жағдайда балалардың құлауы олардың ата-анасының қарауынсыз үйде қалуы себебінен орын алады. Қасіреттің алдын алу үшін, кішкентай балаларды 1 минутқа да жалғыз қалдырмау керек. Сонымен бірге барлық жиһаздарды бала терезе алдына шыға алмайтындай етіп, терезе жанынан алшақ қою ұсынылады.

 Терезедегі москиттік торларға сенбеу керек. Олар құлаудан сақтауға арналмаған. Керісінше, москиттік тор қайғылы жағдайдың орын алуына әкеліп соғады, балалар москиттік торларды қауіпсіз деп ойлайды және терезеге сүйенгендей сол торларға сүйенеді. Ең сапалы тордың өзі баланың салмағы мен қысымды көтере алмайды.

Егер балаңыз бөлмеде болса,  терезені және балкон есігін ашпаңыз. Жоғарғы желдеткіштерді немесе тік желдету режимін пайдаланыңыз. Бала терезені өз еркімен аша алмауы үшін терезеге арнайы бекіткіштер орнату қажет.

Егер сіз балаңызға терезеден бір нәрсе көрсететін болсаңыз, оны мықтап ұстаңыз, баланың шұғыл қимылдарына дайын болыңыз, алақанды құрғақ ұстаңыз, баланы киімінен ұстамаңыз. Балаларға қауіпсіздік сабақтарын үйретіңіз. Балалардың үлкендеріне өзінен кішілерге қарауға үйретіңіз.