Аудан басшысы "Құрмет" орденімен марапатталды
Бүгін «Өнер орталығында» облыс әкімі Нұрлыбек Нәлібаевтың қатысуымен 1 мамыр - Қазақстан халқының бірлігі күніне орай
мерекелік шара өткізілді. Тағылымды шарада Қармақшы ауданының әкімі Жандос Еркінбек «Құрмет» орденімен марапатталды.
«Құрмет» ордені – ел игілігі жолындағы тынымсыз еңбектің, адал қызмет пен жоғары жауапкершіліктің лайықты бағасы.
Бұл жоғары мемлекеттік награда оның мемлекеттік қызметтегі жауапкершілігі мен кәсібилігін, өңірдің әлеуметтік-экономикалық дамуына қосқан елеулі үлесін айқындайды. Ауданның инфрақұрылымын дамыту, халықтың тұрмыс сапасын жақсарту, кәсіпкерлікті қолдау және әлеуметтік саланы ілгерілету бағытында атқарған жұмыстары – жүйелі еңбектің нәтижесі.
Жандос Еркінбек басшылық еткен кезеңде Қармақшы ауданында бірқатар маңызды жобалар жүзеге асып, елді мекендердің келбеті жаңарып, тұрғындардың әл-ауқатын арттыруға бағытталған бастамалар қарқын алды. Сонымен қатар, халықпен ашық диалог орнатып, өзекті мәселелерді дер кезінде шешуге ұмтылуы оның басқару стилінің басты ерекшелігіне айналды.
