Тұрмыстық химиялық заттардан уланудың алдын алу жолдары

Күнделікті өмірде қолданылатын тұрмыстық химиялық заттар – тазартқыштар, жуғыш құралдар, дезинфекциялаушы сұйықтықтар мен әртүрлі техникалық қоспалар – қауіпсіздік ережелері сақталмаған жағдайда улану қаупін тудыруы мүмкін. Сонымен бірге тыңайтқыштар, еріткіштер, бояулар және өндірістік химиялық реагенттермен дұрыс жұмыс істемеу де ағзаға зиян келтіреді. Химиялық заттардың адам ағзасына түсуі тыныс алу мүшелері, тері арқылы немесе ас қорыту жолдары арқылы жүзеге асады. Мұндай улану түрлері көбіне дәрілік препараттарды шамадан тыс қабылдаудан, агрессивті тазалау құралдарының буларын жұтудан немесе қауіпті сұйықтықтарды абайсызда ішіп қоюдан кейін байқалады.

Уланудың клиникалық көрінісі әртүрлі факторларға байланысты: заттың түрі, ағзаға түскен мөлшері, адамның жасы мен физиологиялық ерекшеліктері. Мысалы, ересек адамға әсер етпейтін аздаған доза балаларда ауыр асқынулар тудыруы мүмкін. Жүкті әйелдерде де ағзаның сезімталдығы жоғары болғандықтан, интоксикация белгілері қаттырақ байқалуы ықтимал.

Балаларда химиялық уланудың негізгі симптомдары көбіне тез дамиды: бастың айналуы, құсу, әлсіздік, селқостық, сананың шатасуы, іштің ауыруы, жүрек соғысының жиілеуі, тыныс алудың қиындауы, тері түсінің өзгеруі, көздің қызарып, жас ағуы, диарея немесе сусыздану белгілері пайда болуы мүмкін. Ауыр жағдайларда жүрек жұмысының тоқтау қаупі де бар.

Сондықтан қауіпті химиялық заттарды дұрыс сақтау – уланудың алдын алудың басты шарттарының бірі. Барлық жуу және тазалау құралдарын, спирттік ерітінділерді, техникалық сұйықтықтарды және медициналық препараттарды балалар қолы жетпейтін, арнайы жабық орындарда ұстаған жөн. Қауіпті сұйықтықтарды ішетін су немесе сусын құятын бөтелкелерге құюға болмайды – бұл балалардың шатасып ішіп қоюына әкелуі мүмкін.

Кез келген химиялық затты қолданбас бұрын нұсқаулықпен танысып, қауіпсіздік талаптарын қатаң сақтау қажет. Тыңайтқыштармен, бояулармен немесе агрессивті реагенттермен жұмыс істеген кезде жеке қорғаныс құралдарын пайдалану ұсынылады.

Егер улану белгілері байқалса, уақыт жоғалтпай жедел жәрдем шақыру қажет. Уақтылы көмек адамның өмірін сақтап қалуы мүмкін.

Өзіңіз бен жақындарыңыздың қауіпсіздігіне мұқият болыңыз.