ЗИЯНДЫ ӘДЕТТЕР – ЖАСТАРДЫҢ БОЛАШАҒЫНА БАЛТА
Бүгінгі қоғамда жастардың бойында зиянды әдеттерге әуестік артып бара жатқаны жасырын емес. Темекі тарту, ішімдік ішу, есірткіге елігу, интернет пен ойынға тәуелді болу – жас ұрпақтың денсаулығына ғана емес, рухани дүниесіне де зор зиян тигізіп отыр.
Жаратушы Құран Кәрімде: «Өз қолдарыңмен өздеріңді қауіп-қатерге салмаңдар…» дейді. Бұл аятта адам баласына өз денесін, ақылын, өмірін қорғау міндеттеледі. Зиянды әдеттердің барлығы – осы аманатқа қиянат. Себебі денсаулық – Құдайдың берген ең ұлы нығметтерінің бірі.
Пайғамбарымыз өз хадисінде: «Екі нығмет бар, көпшілік адам қадірін білмейді: бос уақыт пен денсаулық» – деген (Бухари риуаят еткен). Демек, денсаулық пен уақытты дұрыс пайдаланбау – адамның өз өмірін зая кетіруі.
Зиянды әдетке берілген адам тек өзіне емес, қоғамға да зиян келтіреді. Темекі мен ішімдік – адам ағзасын әлсіретіп, түрлі дертке жол ашады. Ойынқұмарлық пен әлеуметтік желіге тәуелділік – уақытты ұрлап, отбасылық байланыстарды әлсіретеді.
Жастарымызға айтар кеңесіміз: алдымен ниетті түзеу, одан кейін намазға жақындау, яғни құлшылық адамды жаман істерден тыяды. Жақсы орта құру. Пайғамбарымыз айтқандай: «Адам – досының дінінде». Уақытты пайдалы өткізу, яғни спортпен шұғылдану, кітап оқу, мешіт дәрістеріне қатысу – рухты күшейтеді.
Жастар – ұлттың болашағы, үмметтің үміті. Зиянды әдетке ерген әрбір жас – өз болашағына балта шабады. Сондықтан ата-ана да, ұстаз да, дін қызметкері де жастардың тәрбиесіне бейжай қарамауы тиіс.
Нұрболат РАХМЕТУЛЛАЕВ,
аудандық «Қармақшы ата» мешітінің бас имамы
