АНА СҮТІ – ТІРШІЛІКТІҢ ТҰМАРЫ

Ему кезінде баланың бүкіл ағзалары жұмыс істейді. Бастағы қан айналымы жақсарып, жақ сүйектері мен ауыз, ерін бұлшық еттері тез жетіледі. Оған ең алдымен уыз берілуі де ғажап. Өйткені уыз құрамы сәбидің әл жинауына, тез ширауына қажетті дәрумендерге өте бай.

Бір қызығы, бала өскен сайын ана сүті құрамындағы қоректік заттар да қоса өзгеріп отырады. Қазақтың әлсіз, әлжуаз балаларды көргенде «уызға жарымаған» деп жатуының мәні осы.

Ешқашан бірдей екі ана сүтін кездестіру мүмкін емес. Өйткені олардың құрамы, майлылығы баласының қажеттілігіне қарай әр әйелде өзгеріп отырады.

Ана мен бала арасындағы алғашқы байланыс та осы сүт арқылы беріледі. Ана сәбиін емізген сәтте екеуінің жүрек лүпілі үндесіп, жан дүниесі астасып жатады. Бұл – сөзсіз махаббаттың, шексіз қамқорлықтың көрінісі.

Ана сүтінің орнын ешқандай қоспа баса алмайды. Оның иісі де, дәмі де, қуаты да – ерекше. Ол – әр балаға Жаратқанның берген алғашқы несібесі.

Ана сүті мынадай тиімділігімен ерекшеленеді: ол қашанда қасыңызда, ылғи да тұтынуға дайын, арнайы әзірлеуді қажет етпейді; бірнеше күн анасы емізбесе де көкіректе не ашып, не бұзылып кетпейді, оны еш жерден сатып алмайсыз, ол тек сіздің балаңызға ғана арналған.

Мамандардың айтуынша, сүт қоспаларында кездеспейтін 400 түрлі қоректік зат ана сүтінде ғана кездеседі. Мысалы, сиыр сүтіне қарағанда емшек сүтінде балаға ең керекті А, Е, Д дәрумендері көп.

Ана сүтінің құрамына белок, май, түрлі витаминдер, гормондар, темір, көмірсутектер, үнемі жеткілікті су, минералды тұздар, кальций, фосфат, өмірге керекті микроэлементтер (селен, мыс, мырыш, молибден, магний, марганец) бар.

Бүгінгі жас аналарға айтарымыз – сәбиіңізге берер ең үлкен сыйлығыңыз да, ең қымбат дәруіңіз де – өзіңіздің сүтіңіз. Сондықтан осы табиғи байлықты бағалай білейік, пайдалана білейік. Ана сүті – болашақтың алтын діңгегі.