Саналы ұрпақ – ел болашағы

Біз кімді кімді тәрбиелеудеміз? Келешек елдің тізгінін ұстар кімдер? Осы сауал соңғы уақытта көптің көкейінде жүр. Себепте жоқ емес. Әлеуметтік желілерде әлсін-әлсін бесіктен белі жаңа шыққан жасөспірімдердің тентектік видеолары қаптап кетті. Бірі – өз қатарласына үстемдік жүргізіп жатса, бірі – замандасының «үстінде» атой салуда. Мәселен, кешегі Семейдегі бір топ оқушының өз қатарласын аяусыз соққыға жығуы осыған дәлел. Айдың күннің аманында жасөспірімдердің мұндай жағымсыз іс-әрекетіне ел алаңдаулы. Видеоға қарасаңыз бұл әсіре сілтеу немесе жай тентектік емес, нағыз озбырлық. Қоғамның сауалы осыған қалай бөгет болмақпыз?

Бала тәрбиесі, ұрпақ саулығы мен саламаттығы тек педагоктың мойнына жүктелген міндет емес. Осыған қоғамның кез келген мүшесі жауапты. Қай сала да ұрпақ өмірін баянды етуге атсалысады. Дегенмен, тәрбие саласы көп жағдайда ұстаздарға артылғандай көрінеді бізге.

Жақында осы мәселе төңірегінде «Саналы ұрпақ – ел болашағы» атты аудандық форум өтті. Онда аудан әкімі Жандос Еркінбек, аудан прокуроры Мейрамбек Маханбетжанов, облыстық және аудандық мәслихат депутаттары, аудандағы құқық қорғау саласының басшылары, жергілікті атқамінерлер, ақсақалдар, үкіметтік емес ұйым өкілдері, қоғам белсенділері, аудандағы барша мектептің бас педагоктары, ұстаздар және жастар кент орталығындағы мәдениет үйінде бас қосты.

Форумның ашылуында аудан басшысы сөз сөйлеп, құқықбұзушылықтың алдын алу, халықтың құқықтық сауатын арттыру және құқық қорғау органдары мен қоғам арасындағы ынтымақтастықты нығайту бағытында атқарылған жұмыстардың нәтижесінде аудандағы қылмыс деңгейінің төмендегенін атап өтті.

– Аудан бойынша соңғы жылдары құқық қорғау органдарымен және қоғаммен бірлесіп жасаған жұмыстардың нәтижесінде құқықбұзушылық сипаттамадағы қылмыстық іс әрекеттер азайып келеді. «Тәрбиелі адам – тағалы атпен тең» деген халқымыздың дана сөзі бар. Тәртіп пен заң үстемдік еткен қоғамда ғана тұрақтылық пен өркендеу болады. Президентіміз де әрбір заңға бағынып, адал еңбек еткен азаматтың құрметке лайық екенін айтқан болатын. Сондықтан жастарымызды саналы ұрпақ ретінде қалыптастыру, олардың бойына отансүйгіштік пен жауапкершілік ұғымдарын сіңіру – біздің басты міндетіміз, – деді аудан әкімі.

Мемлекет басшысы өз Жолдауында «Әділетті қоғам құру және соның арқасында дамудың сара жолына түскен озық ел болу» деген-ді. Бүгінгі таңда құқықтық тәртіп пен қоғамдық қауіпсіздік кез келген қоғамның дамуы мен тұрақтылығының негізі. Қылмыспен күресу және қоғамдық тәртіпті сақтау үлкен жауапкершілікті қажет ететін маңызды міндет.

Жиында мұнан соң аудан прокурорының орынбасары Зураб Гичиев құқықбұзушылықтың алдын алу бағытында атқарылып жатқан жұмыстарға тоқталып, құқықтық мәдениетті арттырудың маңыздылығын атап өтті.

Аудандық ардагерлер кеңесінің төрағасы Асқар Мереков, әйелдер кеңесінің төрайымы Гүлжауһар Раева сөз алып, өскелең ұрпақтың саналы әрі сапалы білім алуына, елге адал қызмет етуіне ерекше мән беру керектігін айтты.

Форумның арнайы қонағы болған «Қазақстан барысы – 2022» турнирінің жеңімпазы, жерлесіміз Мақсат Исағабылов өз тәжірибесімен бөлісіп, жастарды спортпен шұғылдануға, зиянды әрекеттерден бойын аулақ ұстауға шақырды.

– Қазір жастар арасында құқықбұзушылық көбейгені рас. Оны көзімізбен көріп, құлағымызбен естіп жүрміз. Алайда өскелең ұрпаққа болашақ жастардың қолында деп айтқым келеді. Бір елде тұрып бір-бірімізбен жаға жыртысқанымыз жарамайды. Сондықтан бір үйдің баласындай бірлігіміз мықты болу керек, «қазақ» деген атқа кір келтірмеуіміз қажет. Жастарға зиянды әдеттен аулақ болып, саламатты өмір сүріңіздер дегім келеді, – деді қазақ барысы Мақсат.

Жиын соңында аудан әкімі мен аудан прокуроры құқық бұзушылықтың алдын алу шараларына белсенді атсалысып жүрген азаматтарға алғыс хат табыстап, олардың еңбегін ерекше атап өтті.

Форум жастарға тағылымы мол ой салып, олардың рухани-адамгершілік қасиеттерін дамытуға бағытталған маңызды жиын болды.