Менің болашақ мамандығым

Мемлекет басшысы Қасым-Жомарт Тоқаев кәсіптік білім беру саласына реформа жасаудың айрықша өзектілігін алға тартып, 2025 жылды «Жұмысшы мамандықтары жылы» деп жариялады.

Жұмысшы мамандығының мәртебесін көтеру – қоғамда еңбек адамының қадірін арттыру, оның кәсіби біліктілігін шыңдау, жұмысшы қарым-қабілетін жан-жақты бағалау арқылы жүзеге асатын сан салалы үдеріс.

Осы орайда, ауданымызда адал әрі табанды еңбегімен табысқа жеткен кәсіп иелерімен білім алушыларды таныстырып, үлгі ету мақсатында Қармақшы аграрлы-техникалық колледжінде «Мамандығым - мақтанышым» атты кездесу кеші өтті.

Кеш қонақтары ауданымызды кондитерлік өнімдермен қамтамасыз етіп жүрген «Sezim desert» кондитерлік дүкенің басшысы Айқодықова Гүлсезім және «Әмбебап» тігін цехының бас маманы Айекенова Ғалия, кездесу барысында студент жастармен қызықты әңгіме өрбітіп, сұрақтарға жауап берді.