Болашақ университетінің студенттік жатақханасына арнайы мониторинг жүргізілді. Бұл тексеру ҚР Ғылым және жоғары білім министрлігіне қарасты Қызылорда облыстық студенттік омбудсмені Назерке Жасұланқызы және Қызылорда студенттері Альянсының төрағасы Расул Базарханұлының ұйымдастыруымен жүзеге асырылды.

Тексеру барысында жатақханалардың қысқы маусымға дайындығы мұқият қарастырылды. Атап айтқанда, жылыту жүйелерінің жағдайы, терезе және есіктердің тығыз жабылуы, жалпы жылу жүйесінің тиімділігі тексерілді. Сонымен қатар, жатақханалардың қолайлылығы, санитарлық талаптарға сәйкестігі, қауіпсіздік стандарттарының орындалуы және тұрмыстық жағдайлардың (техника мен жиһаздың сапасы) талаптарға сай болуы назардан тыс қалмады.

Жатақханалардың санитарлық жағдайы, жуыну бөлмелері мен асханалардың тазалығы, өрт қауіпсіздігі мен алғашқы көмек көрсету құралдарының бар-жоғы сияқты маңызды аспектілер де тексерістен өтті. Тексеру кезінде студенттердің тұрмыс жағдайы мен оқу процесіне жасалған жағдайлар да бағаланды.

Сонымен қатар, студенттердің өзекті мәселелері мен сұрақтарына назар аударылды. Мониторинг барысында студенттермен кездесу ұйымдастырылып, олардың пікірлері мен ұсыныстары тыңдалды. Жатақхана тұрғындарына студенттік ұйымдар мен омбудсмен туралы ақпарат беріліп, байланыс құралдары ұсынылды.

Назерке Жасұланқызының пікірінше, мұндай мониторингтер студенттердің өмір сүру жағдайларын жақсарту және олардың құқықтарын қорғау үшін өте маңызды. Алдағы уақытта жатақханаларда анықталған кемшіліктерді жою бойынша тиісті шаралар қабылданады.

Қызылорда облыстық студенттік омбудсмені Назерке Жасұланқызы: «Біздің басты мақсатымыз - студенттердің өмір сүру жағдайларын жақсартып, олардың құқықтарын қорғау және қауіпсіздігін қамтамасыз ету. Студенттердің пікірлері мен ұсыныстары біз үшін өте құнды.»