Мониторинг жұмыстары жүргізілді
«Nur Otan» партиясы Қармақшы аудандық филиалының жанындағы партиялық бақылау комиссиясының төрағасы, аудандық мәслихат депутаты Скендіров Айдынбек Айтбайұлы және комиссия мүшелері Қармақшы аграрлы-техникалық колледжінің оқу ғимараты мен жатақханасының 2021-2022 оқу жылына дайындығы мен сапасына мониторинг жұмыстарын жүргізді.
Қармақшы аграрлы-техникалық колледжінің оқу ғимараты мен жатақханасы 2019 жылы толығымен күрделі жөндеуден өткізілді. Оқу ғимараты 1 оқу шеберханасы, 7 зертхана, 8 арнайы пән кабинеті және 10 білім беретін оқу кабинеттерінен тұрады. Колледж жатақханасы 1976 жылы іске қосылған. Жатақхана 3 қабаттан тұрады.
Мониторинг барысында оқу ғимаратының оқу шеберханасында болып, «Жас маман» жобасы аясында жүзеге асырылған «Тігін өндірісі және киімдерді үлгілеу» мамандығы бойынша оқу кабинеттерінің, зертханаларының материалдық-техникалық базасы қазіргі заманауи технологиялармен толықтай жабдықталған. Сондай-ақ, оқу ғимараты мен жатақхананың санитарлық талаптарының сақталуы, антисептикалық құралдарының болуы басты назарға алынған. Мониторинг жұмыстарының барысында оқу ғимаратының және студенттердің жаңа оқу жылына дайын екендігі анықталды.
