Өзгеріс өзіңнен басталсын

Себебіне үңілер болсақ, адамдар бір-бірімен жиі кездеспейді. Барлық нәрсені телефон көмегімен шешіп отыра беруге болатыны жасырын емес. Оған қоса, әлеуметтік желідегі әдемі әлем мен көз қызығар тартымды суретке алданып, өз өмірі қызықсыздай көрінеді. Өзгенің жетістігіне қызғаныш танытып, ол жинақтала берген соң жанындағыларды өз бойындағы жағымсыз энергиямен улайды. Ал, әлеуметтік желідегі әдемі әлемнің шынайылығына кім кепіл? Желіге арнайы фотосессияда немесе тойда түскен керемет суреттерін қойып, өмірде тіпті сізден де қарапайым өмір сүруі мүмкін ғой. Қазіргі «блогер» деген атты иемденіп жүрген мамандық иесінің өзі әлеуметтік желіге өмірінің 20 пайызын ғана салады екен. Ал қалған уақытта оның немен айналысып жатқанын ешкім білмейді. Сол себепті біреуді күндемес алдын, біреуге қызықпас бұрын ой таразынан өткізу қажет. Өзгенің өмірін аңдымай, өзіміздің ішімізге үңілгеніміз әлдеқайда жақсы. Осы орайда Шәкәрім Құдайбердіұлының мына шумақтары ойға оралады.

Біреудің мінін көргенше,

Жамандығын тергенше.

Өз бойыңды мазалап,

Өз ойыңды тазалап,

Өзіңмен алыс өлгенше.

Мағынасын түсінген адамға ой саларлық дүние. Себебі өзін бағындырмаған адамның биік шыңды бағындырам дегені бос әңгіме. Біз өзіміз қандай болсақ, айналамыз да сондай. Өйткені айналамыз біздің ішкі жан-дүниеміздің көрінісі. Өзімізде бар нәрсені ғана өзгеден көреміз. Мысалы сізде бұрын көлік болған жоқ. Ал жеке көлікті болғаннан кейін сіз көлігі барлар көп екенін аңғарасыз. Сол секілді сезім кез келген нәрсені жаңадан иемденген кезде болып отырады. Ал адамның мінезіндегі ақау тұстарын көру де осы секілді. Егер сіз ашуланшақ болсаңыз жаныңыздағы адамның барлығын солай көресіз. Өзгенің бойындағы кемшілікті көрген сәтте-ақ өзіңізді қолға алыңыз. Сабыр сақтап, өзіңізбен жұмыс жасаңыз. Айтуға оңай болғанмен ең қиыны өзіңмен күресу.

Бәлкім, қит етсе «өзің өзгерсең, өмірің өзгереді» деген сөздерден шаршаған шығарсыздар. Бірақ бұл шындық. Айналамызды жақсы адаммен қоршағымыз келсе, алдымен өзіміз жақсы болуымыз керек. «Өздерің өзгермейінше, мен сендерді өзгертпеймін» деген Құдайдың сөзі де бұған нақты дәлел. Сондықтан да ойымызды, сөзімізді түзейік. Көзіміз тек жақсылық көріп, аузымыздан тек жақсы сөз шықса міндетті түрде жақсылықты ғана еститін боласыз. Күндердің күнінде гүлденген әлем мен мейірімді жандардың ортасында жүргеніңізді аңғармай қаласыз.

Осы ретте:

Керемет жан санамай, өзіңді босқа,

Өзіңнен шыққан әрбір сөзіңді раста.

Иілмес айналаңның бәрі сен үшін,

Өзгерткің келсе бәрін, өзіңнен баста, – деп Ділбар Маликова жырлағандай барлығы өз қолымызда. Жақсыны көрмекке, пайдалыны үйренбекке, жақсылықты бөліспекке асық болыңыз!

Ардақ СӘКЕНҚЫЗЫ