Тұмау деміктірмесін

Халқымызда «Тұмау түбі – құрт, тұман түбі – жұт» деген сөз бар. Тұмауды жеңіл ауру деп қарауға болмайды. Тұмаудың негізгі белгілері – дене қызуының көтерілуі, қалтырау, бас пен бұлшық ет, тамақтың ауыруы, жөтелу және әлсіздік. Тұмау тез өрбиді және бірнеше күннен 2 аптаға дейін созылуы мүмкін. Сырқат өкпе қабынуы және бронхит сияқты асқынуларға әкеледі. Тұмау температураның күрт көтерілуімен (кейбір жағдайларда 40,5 градусқа дейін), жарыққа сезімталдықтың жоғарылауымен, бүкіл дененің ауырсынуымен, сондай-ақ бас және бұлшық ет ауырсынуымен сипатталады. Алдын алу үшін науқас адаммен байланыста болмауға тырысу, науқас адаммен байланыста болғанда бетперде тағу, инфекция таралмауы үшін қолды сабынмен немесе бактерияға қарсы құралдармен жуу, жөтелгенде және түшкіргенде мұрын мен ауызды бір реттік орамалмен жабу, көп адам жиналған жерде болмауға тырысу, бөлменің ауасын жиі тазарту. Сондай-ақ тұмауға қарсы екпе салдыру.

Тұмау мерзімі басталғанға дейінгі ең тиімді әдіс – вакцина салдыру. Ол тұмауды жұқтыруды төмендетіп, оның адамдар арасында таралмауына көмектеседі. Вакцинация халықтың барлық топтарына ұсынылады. Әсіресе қауіпті контингенттер, яғни медицина қызметкерлері, медициналық ұйымдарда диспансерлік есепте тұрған балалар, алты айдан асқан әлсіреген және жиі ауыратын балалар, сәбилер үйлерінің балалары, қарттар мен мүгедектер үйлерінің контингенті, жүктіліктің екінші немесе үшінші триместріндегі жүкті әйелдер және эпидемиологиялық көрсеткіштер бойынша тұрғындар міндетті түрде алғаны жөн.

Тұмауға қарсы вакцина негізінен қыркүйек-қараша айларында жүргізіледі. Тұмауға шалдыққанда ауруды таратпау үшін үйде отбасының басқа мүшелерінен оқшауланып, аурудың алғашқы белгілері байқалғанда-ақ дәрігер шақырып, бір реттік орамал пайдаланған жөн. Сонымен қатар, емделу барысында дәруменге бай сұйықтық ішу, дәрігердің нұсқауына сай ем қабылдау қажет.

Бұл вирус ауа-тамшы жолы арқылы таралатындықтан күнделікті гигиена сақтау, үй ішін уақытылы желдетіп, ауаны тазарту, сондай-ақ, саламатты өмір салтын ұстанып, пайдалы, құнарлы тамақтануды қолға алу керек. Мұрын мен ауыз қуысын ұдайы тұзды ерітіндімен шайып, су немесе қант қосылмаған шырындар мен шайды көбірек ішкен пайдалы. Жоғарыда көрсетілген сақтану шараларын назарға ала отырып, өз денсаулығымызды сақтайық.