Бүгінде жыр көгінде жұлдыз болып ерте ағып түскен сөз өнерінің саңлағы Арнұр Көшенейұлы туралы естеліктер аз айтылып жүрген жоқ. Ол көзі тірісінде жыршы-термеші әулетінің сынығындай боп алдыңғы буынның жолын жалғастырып, дәстүрлі өнерді өшірмеу жолында еңбек етті. Жыр жампозы Арнұр кім деген де, әріге бармайақ Жиенбай, Рүстембек жыраулардың сарқыты, Көшенейдің бел баласы, Сыр сүлейлерінің жалғасы деген болмыспен еске түседі. Иә, бұл халықтың берген бағасы. Арнұр Сыр елінің мәдениет саласына өлшеусіз еңбегін сіңірді. Жыраулық өнерді жандандырып, өзіндік дауыс ырғағымен тыңдарманның құлақ құрышын қандырып, жырымен сусындатты. Еңбек жолында еліміздегі жас жыршы-термешілерге ұстаздық етіп, насихаттауды өзіне парыз етті.

Атадан аманат болған, жыраулық өнердің байрағын түсірмей, байламын босатпай жалғап келген Арнұр Көшенейұлының өмірден өткеніне де жылға жуықтады. Жақында аудандағы Ш.Төлепова атындағы мәдениет үйінің ұжымы «Ғибрат» ас үйінде білікті басшы, жыр өнерінің майталманына арнап ас берді. Жиынға ауданның зиялы қауым өкілдері қатысып, естеліктермен бөлісті.