Кеше қармақшылық педагогтар аймақ басшысы Нұрлыбек Мәшбекұлының қатысуымен өткен облыстық Тамыз кеңесіне онлайн форматта қатысты.

«Білімді ұлт: терең білім, еңбекқорлық және отаншылдық қасиет» тақырыбында ұйымдастырылған кеңесте білім саласының өзекті мәселелері қаралып, үздік ұстаздар марапат мінберінен көрінді.

Аймақтық тамыз кеңесі аяқталғаннан кейін, іс-шара аудандық педагогика қызметкерлерінің алқалы жиынымен жалғасты.

Жиында сөз алған аудан басшысының міндетін уақытша атқарушы Жұлдызхан Байназарұлы педагогтарды жаңа оқу жылының басталуымен құттықтады.

Сондай-ақ, білім саласындағы жетістіктерге тоқталып, 2021-2022 оқу жылынының қорытындысымен 385 оқушы грант иегері атанғанын тілге тиек етті. Сонымен бірге, оқушыларға білім алуға қолайлы жағдай жасау үшін аудандағы №28, №85 және №121 орта мектептерге күрделі жөндеу жұмыстары жүргізіліп жатқандығын баса айтты.

Одан бөлек, дарынды жастарымыз жыл сайын түрлі білім додаларында топ жарып, ауданымыздың мерейін үстем етуде. Атап айтқанда облыстық пәндік олимпиададан 20 оқушы жүлделі орын алған. Республикалық олимпиадаға 7 оқушы жолдама алып, 3 оқушы жеңімпаз атанып отыр.

Сонымен қатар, алқалы жиында ардагер ұстаздар сөз алып, өздерінің ізгі лебіздерін жеткізді. Жиын соңында білім беру ісіне зор үлес қосып, ерекше еңбек еткен бірқатар педагогтарға Қазақстан Республикасы оқу-ағарту министрлігінің, облыс әкімінің, облыстық білім басқармасының және аудан әкімінің «Алғыс» хаттары табысталды.