СОҢҒЫ ҚОҢЫРАУ СЫҢҒЫРЛАП, ОҚУШЫЛАР ҮШ АЙ ДЕМАЛЫСҚА ШЫҚТЫ. ЖАЗ – ЖАРҚЫН МЕЗГІЛ. «ЖАЗ ЖАЙНАТЫП, КҮН КҮЛДІРІП, БІЗ ЛАГЕРЬГЕ БАРАМЫЗ» ДЕП ОҚУ ЖЫЛЫ АЯҚТАЛЫСЫМЕН МЕКТЕП ОҚУШЫЛАРЫ ЖАЗҒЫ ТЫНЫҒУ ЛАГЕРЬЛЕРІНЕ БАРУҒА АСЫҒАДЫ. ЖАЙРАҢДАҒАН ЖАЗДЫҢ ҚУАНЫШ ПЕН ШАТТЫҚҚА ТОЛЫ ҰМЫТЫЛМАС ЕСТЕЛІКТЕРІ ОСЫНДАЙ ЖАЗҒЫ ДЕМАЛЫС ЛАГЕРІНЕН БАСТАУ АЛАТЫНЫ СӨЗСІЗ.

Жаз келді дегеннен әрбір ата-ана «Баламның жазғы демалысын қалай ұйым­дастырсақ екен?», «Уақытын тиім­ді өткізу үшін қо­сымша курстар мен үйірмелерге берейік пе, әлде оқу-білімнен же­рітіп аламыз ба?» деген сұрақтарға жауап іздейтіні белгілі.

Расында да жазғы каникул­ балалардың жылдық бос уақы­тының айтарлықтай бөлігін алады. Сондықтан да баланың демалысын дұрыс ұйымдастыра білу маңызды мəселенің бірі. Мектеп психологтары үш ай уақытты тиімді, қызықты әрі үнемді пайдалану үшін бәрін алдын ала ретімен жазып, жоспарлап алуға кеңес береді. Жоспарда баланың еркіндігіне, қалауына мүмкіндік берген жөн.

– Балалардың жаз мезгілін асыға күтетіні белгілі. Мен мау­сым айындағы демалысты қызықты, көңілді етіп ұйым­дастыруға кеңес беремін. Ал­ғашқы айда баланың ойы да, бойы да жақсы демалу керек. Тіпті бұл айда смартфонын сөндіріп тастаған жөн. Егер мүмкіндік болса, балаларға арналған демалыс орында­рына, лагерьге жіберген дұ­рыс. Ол жерде баланың та­мақтануы, ұйқысы, демалуы, ойнайтын және шомылатын уақыты қадағаланады. Өз қатарластарымен ба­ланың демалысы қызықты өтеді. Егер баланы лагерьге жіберудің реті келмесе, жазғы демалыстың бірінші айында табиғат аясында жиі отбасылық демалыс ұйымдастырып, шомылуға ертіп баруға болады. Баламен бірге футбол ойнау, қыдыру, серуендеу, бірге кәуап пісіру – оның қа­лауын, хоббиін, армандарын, байқамай жүрген қабілетін білуге мүмкіндік береді. Жалпы тек жазғы демалыста ғана емес, басқа айларда сенбі-жексенбі күндері отбасылық демалыс ұйымдастыруға тырысу керек. Бұл отбасындағы балалар мен ересектер арасында түсіністік орнауына септігін тигізеді, әрі көп мәселенің алдын алады, – дейді мектеп психологі.

Ал аудандық білім бөлі­мі тарапынан аудандық тө­тенше жағ­дайлар бөлімімен бірлескен түрде мектептер­де қауіпсіздікке, су, өрт жағ­дайларының алдын алу бо­йынша түсіндірме жұмыстары ұдайы жүргізіледі.

– Қазіргі жасөспірімдердің күн тәр­тібіндегі бірінші мә­селесі – олардың қа­уіпсіз, ба­қытты өмір сүруі. Осы орайда білім беру мекемелеріндегі ата-аналар жиналысында біздің мамандар қатысып, жазғы дема­лыстағы баланың қауіпсіздігі түсіндіріліп, ақпараттар берілді. Жазғы тынығу кезінде, демалыс лагерьлерінде оқушының қауіпсіздігі бас­ты назарда болуы керек екені ескертілуде. Сонымен қатар таби­ғатқа шығу демалыстары, су, өрт, көлік, төтенше жағдайларға байланыс­ты қауіпсіздік шара­лары жөнінде жиналыстар ұйымдастырылып, ережелер жа­дынама ретінде таратылды. Мұның барлығы – бала қауіпсіздігі үшін атқарылған шаралар. Алдағы уақытта да мұндай жұмыстар жалғасын таба бермек. 2021-2022 оқу жылында 1-10 сынып аралығында 14543 оқушының 8743-не жазғы демалыс және еңбекпен қамту жұмыстарын жүзеге асыру жос­парлануда. Сыртқы лагерьге – 417 оқушы, мектеп жанындағы тамақсыз тынығу лагеріне – 8206 оқушы (1-5 сынып) қамтылады. 9-сынып оқушыларынан құрал­ған 1172 оқушы көркейту-көгалдандыру бригадаларында, 10-сынып оқу­шыларынан құралған 573 бала еңбек бригадасына оқу практика есебінен жұмыс істе­мек. Мектеп жанынан құрылған аулалық клубтарда – 2289, 641 оқушы дебат үйірмесіне, оқушылар үйінің жанынан құрылған «Жас толқын» аулалық клубқа – 500 оқу­шы барады. Ата-ана мен кәсіпкерлер демеушілігімен 60 оқушы сырт­қы лагерьлерге жіберіледі, – дейді жазғы кезеңде ба­лалар мен жасөспірімдердің демалы­сын, са­уықтырылуын және пай­далы еңбекпен қамтылуын ұйым­дас­тыратын аудандық білім бөлімінің әдіскері А.Тоқшылықова.

Айта кеткен жөн, аудан­ оқу­шылары Қызылорда қала­сын­дағы «Аңсар-Кәусар», «Зерентай», Жаңақорған ауданындағы «Талсу», Арал ауданындағы «Қамбаш» ла­герьлерінде тыны­ғады.

Демалыстағы бала қауіп­сіздігі аудан­дық білім бөлімі үшін басты орында. Мектеп ұжымы демалыс кезінде де өз оқушыларын назардан тыс қалдырған емес. Олардың қайда өткізетіні сұралып, зерттеледі. Сондықтан ата-ана неғұрлым баласын қауіпсіз орында ұста­ғаны абзал.

Кейде біз көп нәрсені ұсақ-түйек санаймыз. Ал мән беріп қарасақ, жазғы лагерьлер – тек демалыс орны ғана емес, үлкен тәрбие мен үгіт-насихат құралы. Мәселен, балалар онда демалып қана қоймай, денсаулығын түзейді, қоршаған ортаны танып, достыққа бейімделеді. Туған жердің орман-тауын, өзен-көлін, даласын көріп-білу және оның күллі сұлулығын сезіну әрбір баланың бойында ұлттық сананың қалыптасуына алғышарт болады. Жалпы бала­ның жазғы каникулын денінің саулығын, білімін, тәрбиесін және шығармашылық талантын дамытумен үйлестіре білуді – демалысты дұрыс ұйымдастыру дейді. Бұл әр ата-ананың өз қолында. Айналып келгенде, балаға бүгінгі жасалатын қамқорлық – елдің ертеңіне салынған инвестиция іспеттес. Ал сіз балаңыздың жазғы демалысын жоспарладыңыз ба?