Салада ілгерілеу бар

Аудан орталығының күнделікті тыныс-тіршілігін бес саусағындай біліп, келеңсіз жағдайлар орын алса дереу іске кірісетін коммуналдық саланың қашанда арқалайтын жауапкершілік жүгі ауыр.

Тұрмысқа қажетті күрмеулі мә­селелерді уақытылы шешіп, сапалы қызметпен қамтамасыз етіп отырған аудандық тұрғын үй-коммуналдық ша­руашылығы, жолаушылар көлігі және автомобиль жолдары бөлімі қандай жұмыстар атқарды, биылға қандай жос­пары бар? Ауданда аталмыш сала бо­йынша нендей жобалар жүзеге асырылуда? Осы жайында сұрап білген едік.

Иә, коммуналдық бағыт – салғырт­тықты көтермейтін сала. Халықтың көңілінен шығып, сапалы қызмет көрсету – бөлімге жүктелген басты міндет. Оны мамандар жақсы түсінеді.

Аудан аумағында жалпы ұзын­дығы 335,7 км құрайтын автомобиль жол­дары бар. Өткен жылы «Ауыл – ел бесігі» бағдарламасы аясында Тө­­ретам кентінің 20 көшесіне, Ақ­ай ауылдық округінің 7 көшесіне, Жосалы кентінің 10, ІІІ Интернационал ауылының 3 көшесіне орташа жөндеу жұмыстары жүргізілген. Былтыр аудандық маңыздағы Жалағаш-Жосалы-Марал ишан ке­се­несі автомобиль жолын қайта жаңғырту жұмыстарына демеушілер есебінен жобалық-сметалық құжат­тама рәсімделіп, жоба сараптамадан өткізіліпті.

Сонымен бірге аудандық маңыз­дағы автомобиль жолдарына ағым­дағы жөндеу және оны күтіп ұстау жұмыстарына аудандық бюджеттен 39 444,0 мың теңге қаржы бөлінген. «Бүгінгі күні атқарылатын жұмыс түрлері зерделенуде. Осы жұмыстармен қатар 2022 жылға төмендегі елді мекендердің кө­шелерін жөндеуге «Қызылорда об­лыстық жолаушылар көлігі және автомобиль жолдары басқармасы» ММ-не бюджеттік өтінім тапсырылды» дейді сала мамандары. Қаржы бөлінген жағдайда Жосалы кентінің – 49 жобасы іске асып, ІІІ Интернационал ауылының – 5, Ақай ауылының – 32, Дүр Оңғар ауылының – 9, Ақтөбе ауылының – 4, Қуаңдария ауылының – 3, Алдашбай ахун ауылдық округінің – 3, Қармақшы ауылдық округінің – 3, Ақжар ауылдық округінің – 8, Жосалы ауылдық округінің – 4 көшесіне орташа жөндеу жүргізілетінін айтып қуантты.

– Көпқабатты тұрғын үйлерді жаң­ғырту мәселесі бойынша кондоминиум нысандарына басшылық жасап, оларға күрделі жөндеу жұмыстарын жүргізу мақсатында аудан әкімінің 2013 жылғы 24 қаң­тардағы №359 өкімімен, мемлекеттің 100 процент қатысуымен арнаулы мамандандырылған мекеме – «Туған ел келбеті» жауапкершілігі шектеулі серіктестігі құрылған бо­латын. Аталған серіктестіктің ұйым­­­дас­­тыруымен 2011-2020 жыл­дар аралығында тұрғын үй-ком­му­налдық шаруашылығын жаңғырту мақсатында «Өңірлерді дамыту – 2020» бағдарламасы аясында ауданымыз бойынша 17 көпқабатты тұрғын үйге күрделі жөндеу жүргізілді.

Қазіргі таң­да, көпқабатты тұр­ғын үйлерге күрделі жөндеу жұмыс­тарын жүргізу Қазақстан Республикасы Үкіметінің 2019 жылғы 31 желтоқсандағы №1054 қаулысымен бекітілген тұр­ғын үй-коммуналдық дамудың 2020-2025 жылдарға ар­налған «Нұрлы жер» мемлекеттік бағ­дарламасы арқылы жүзеге асырылады. 2021 жылы «Нұрлы жер» бағдар­ламасы арқылы Жосалы кентінде 1 көпқабатты тұрғын үйге қайта жаңғырту жұмыстары жүр­гізіліп, тұрғындарға табысталды. Бүгінгі күні аудандық ТКШ, ЖК және АЖ бөлімі серіктестік тарапынан ауданымыз бойынша орналасқан көпқабатты тұрғын үйлердегі пә­тер­лердің меншік иелеріне көп­қабатты тұрғын үйді күрделі жөн­деуден өткізуге, тұрғын үйде заңдылыққа сай басқарудың жаңа нысанын құру бойынша түсіндірме жұмыстарын жүргізуде, – дейді бөлім басшысы Рустам Ефенов.

Иә, бұл көпқабатты тұрғын үйдің әл-ауқаты меншік иелеріне байланысты болуы себепті пәтер иелері белсенді болып, бір шешімге келгенде ғана жүзеге асатын жұмыс. Сондықтан тұрғындар мемлекет берген мүмкіндікті тиімді пайдалануға тырысқан жөн бе дейсіз.

Біздің басты жетістігіміз – кент орталығының көгілдір газға қосылуы. «Жосалы кентінде таратушы газ құбырын және орамішілік газ тарату желілерін салу» құрылыс жұмыстары 2019-2021 жылдар аралығында жүргізілді. Қазіргі уақытта табиғи газ пайдаланып отырған кент тұрғындарына «Қызылорда газ тарату жүйесі» коммуналдық мемлекеттік кәсіпорны үздіксіз қызмет көрсетуде. Ал 10 мердігер мекеме газ орнату жұмыстарын атқаруда. Бүгінге дейін Жосалы кентіндегі 4409 тұрғын үйдің 1901-і газ желісін қосуға өтінім тапсырса, 1836 тұрғын үй табиғи газға қосылған. Яғни күніне 10-15 үйге газ қосылып отыр. Ал әлеуметтік нысандар бойынша – 7, кәсіпкерлік нысандар бо­йынша – 54 нысанға газ қосылған.

2021 жылғы 25 қарашада Қармақшы ауданы бойынша жолаушылар мен багажды тұрақты ауданішілік (кентішілік) тасымалдау маршруттарына қызмет көрсету құқығына арналған конкурс жарияланып, нәтижесі бойынша «Жосалы кентішілік №1 бағыт» және «Жосалы кентішілік №2 бағыт» «КадНұр» ЖШС және «ІІІ Интернационал ауылы – Жосалы кенті» және «Дүр Оңғар ауылы – Жосалы кенті» бағыттары бойынша ЖК «Динара» жеңімпаз болып танылған.

Аталған тасымалдаушылар өз қыз­метін көрсетуде. Жосалы кентінде заман талабына сай жаңа «Шынар Ана» автостансаның құрылысы аяқталып, аудан тұрғындарына қызмет көрсетуде.

Сонымен қатар аудан аймағының тазалығын ұйымдастыру және үйлес­тіру – бөлім жұмысының негізгі бағыттарының бірі. Осы тұста аймақ тазалығы мен ондағы түйткілді мәселелерге тек арнайы мекемелер жауапты деу қате түсінік. Себебі, ортақ іске әрбір тұрғын, әрбір азамат мүдделі болуға тиіс. Дегенмен сала мамандары да қарап отырған жоқ. Кент көшелеріне бей-берекет қоқыстарды тастап кететін тұрғындарға түсіндірме жұмыстарын жүргізу мақ­сатында арнайы рейдтік шаралар тұрақты түрде жүргізілуде.

– Міне, өзіңіз көріп отырғандай, бөлімнің жұмысы халықпен тығыз байланыста. Бөлім функциясының қай бағытын алсаңыз да халықтың тұрмыс-тіршілігін жақсартуға бағытталған. Оң нәтиже, өнімді еңбек қашанда бірліктің, жұмыла көтерген тірліктің арқасында келетін дүние. Сондықтан атқарылып жатқан жұмыстарға тұрғындар тарапынан қолдау білдіріліп, тіпті қажеттілік туындай қалса, «сенің жұмысың, менің жұмысым» деп бөлінбей, түсіністікпен қарап, бірлесіп еңбек етуге шақырамын. Бағамдай білген жанға ауданда өткен жылдарға қарағанда көш ілгерілеу бар, – дейді сала мамандары.