Өнер орталығы ашылды

Өнер саласына құмартып жүрген өрендер енді кент ішінен ашылған «Кәусар» өнер орталығына барып қабілеттерін шыңдай алады. Онда балаларға би, домбыра, баян, мәнерлеп оқу, технология сынды қосымша сабақтардан дәріс беріліп, түрлі байқауға қатысуға мүмкіндік жасалады. Қуантарлығы, қандай үйірмеге қатыссаңыз да тегін.

Өнер орталығының ашылу салтанатына жиылғандар алдымен сала мамандарының құттықтауын тыңдады. Аудандық қоғамдық келісім кеңесінің төрағасы Әбдірахман Құлдүйсенов, аудандық мәдениет және тілдерді дамыту бөлімінің басшысы Дәурен Ержанов, ішкі саясат бөлімінің басшысы Самат Смағұловтар ауданда тағы бір шығармашылық орталығының ашылғанына қуанышты екенін жеткізіп, студияның тұңғыш шәкірттеріне сәттілік тіледі. Ал іс-шара барысында лента қиылып, дайындық аудиториялары таныстырылды. Салтанатты жиын соңы бүлдіршіндер өнерімен тәмамдалып, келген қонақтар фуршеттік дастарқаннан ауыз тиді.

– Қазір осындай өнер орталықтарын ашуға мемлекеттен қолдау көп. Біз де осы игілікті жүзеге асырғандардың біріміз. Орталықтың ашылуы білікті мамандарды жұмыспен қамтуға да септігін тигізуде. Сонымен қатар балалар мектептен тыс уақыттарын босқа өткізбей, бейімі бар саланы меңгеруге мүмкіндік алады. Біздегі мамандардың бәрі білікті. Жобаның мақсаты – ел ішіндегі дарынды балаларды жарыққа шығару. Оларды тек аудан, облыс емес, республикалық деңгейдегі байқауларға қатыстыруға атсалысамыз, – дейді орталықтың директоры, жеке кәсіпкер, көпбалалы ана Ұлдана Жетпісова.

Қазір «Өнерді үйрен де, жирен» деген халық даналығынан сусындағысы келген жастардың қатары көбейіп келеді. Сегіз қырлы, бір сырлы болу ешқашан да көптік етпейді. Сондықтан әр ата-ана баласын өнер орталығына апарып, тегін үйірмеден дәріс алуға бағыттаса екен.