Балабақшадағы өнерлі өрендер

Бала – біздің болашағымыз. Ертеңіміздің тұтқасын ұстар ұрпағымыз. Көз қуанышымыз, баға жетпес байлығымыз, қол жетпес бақытымыз. Иә, бәріміз де бар жақсылық балаларға болса дейміз. 2-3 жасқа келгенде білімнің алғашқы баспалдағы саналатын балабақшаға әкелеміз. Жаңадан ашылған өмір атты ақ парақ шыңдалудан басталса дейміз.

Ал мұнда бүлдіршіндерді бағыт-бағдар беруші тәрбиешілерге тапсырамыз. Сондайда балаға тәлім беретін жан білікті, білімді болса дейміз. Болады да. Осындайда ұрпақ тәрбиелеу ісінде тәрбиешілердің еңбегі ерекше екенін түсінеміз, ұғынамыз. Қош. ІІІ Интернационал ауылында №9 «Достық» бөбекжай-бақшасы бар. Мұндағы «Колокольчик» ересектер тобында өнерлі өрендер көп дейді тәрбиешілері Нұргүл Жұбанқызы, Маржан Назарқызы, Сара Маханбетжанқызы.

Мәселен, былтыр мектепке дейі­нгі білім беру ұйымдарының тәрбиеленушілері арасында «Ме­нің Туым. Менің Елтаңбам. Менің Әнұраным» атты қашықтан облыс­тық патриоттық әндер байқауына қатысқан Сағадат Камил ІІ дәрежелі диплом иегері атанды. Өлең айтып, көрермен көзайымына айналған ол түрлі облыстық байқаулардың жеңімпазы.

Ал сурет салу өнерін қолға алып, ерекше ықыласымен тәлімгерлерін тәнті етіп келе жатқан 6 жастағы бүлдіршін Алтынай Қуанышованы да атап өтпеске болмас. Қылқаламды бүлдіршін шақтан серік еткен балақай болашақта атақты суретші боларына сенім мол.

Әр баланың жүрегіне ерекше мейірімділікпен жол таба білген балабақша тәлімгерлеріне де құрмет зор. Олар балаларды Отансүйгіштікке, адами қасиеттерге тәрбиелеу ісіне айрықша көңіл бөлуде. Иә, әрбір балаға бағыт-бағдар беріп, жанына жылу сыйлау – екінің бірінің қолынан келмейтін іс. Балақайлардың апайларына өнерлі өрендердің шабытын шыңдауына сәттілік тілейміз.