Аптаның аяғы келді дегенше Нұрекеңнің ұялы телефонына қоңырау шалушылардың қатары былайғы күндегіден асып жығылады. Себебі мұндағылар ертемен моншаға түсуге жазылып қояды. Ауыл орталығындағы моншаның қызметі әлдеқашан тоқтап қалса да кәсіпкер бүгінгі таңда жұмысын қайта жалғастыруда.

– Бұрын ауылымызда монша халыққа жұмыс жасайтын. Кейін оның қызметі тоқтап қалды. Бертін келе соның ізін қайта жандандырсам деген ой келді. Сөйтіп екі-үш жыл бұрын жоспар құрып, өз қаражатыммен іргетасын тұрғыздым. Қалған жабдықтарға ақшам жетпеген соң мемлекет қолдауымен 6 процент жеңілдетілген несиеге қол жеткіздім. 3 миллионға жуық теңгенің жобасында қаржы құйылып, күзде моншаны іске қостық. Қазір шүкір ауыл тұрғындары үйреністі, алдын ала тапсырыс берушілердің қатары көбейіп келеді. Сенбі, жексенбі күндерінен бөлек 5-6 адам хабарласып жатса монша жаға беремін. Ақысы қолжетімді, – дейді кәсіпкер.

«Жақсыны көрмекке» демекші, жаңа үлгідегі моншаның ішін көруге бізде бас сұқтық. Бөлмелері кең, жарық әрі түсем деушілерге жағдай жасалған. Жуынатын бөлмеден бөлек отырып демалатын дәлізі тағы бар. Ішінде санитарлық тазалыққа аса мән берілген. Сайып келгенде қаладағы қоғамдық моншадан кем түспейді. Өз қолыңмен тірлік істесең тамағың тоқ болары сөзсіз. Қашанда еңбек еткен адамның еңсесі биік, ісі мығым болады. Істің көзін тауып, кәсібін дөңгелетіп жатқандардың жоспары мен алға қойған мақсаты айқын. Одан бөлек еңбектену – береке, ырзықты шақырады.

Нұрлан Қаппарұлы алдағы уақытта бие сауып, жылқы санын көбейтуді де көздеп отыр. Ауыл тұрғындарына саумал ұсынып, дертке ем болар шипа тапсам дейді ол сөзін түйіндей.