Бас бостандығынан шектеу жазасы тағайындалды

Қармақшы аудандық сотында Қазақстан Республикасының Қылмыстық кодексінің 380-бабының 1-бөлігінде көзделген қылмыстық құқық бұзушылықты жасаған азамат Н.-ға қатысты қылмыстық іс қаралды.

Сотта анықталғандай жергілікті полиция қызметінің учаскелік полиция инспекторы А. өзіне бекітілген әкімшілік аймақта қоғамдық тәртіпті қамтамасыз ету  барысында ұялы телефонына әкімшілік аймақ тұрғыны хабарласып, азаматтық некедегі жолдасы сотталушы Н.-ның алкогольдік масаң күйінде жанұя шырқын бұзып, жанжал шығарып жатқанын мәлімдеген.

Көмекке шақырған хабарламаның негізінде мекенжайға барған сәтте, соңғының ескертуін елемей, полиция қызметкерінің заңды талабына бағынбай, былапыт сөздер айтып, жұлқыласып, оң қолының жұдырығымен полиция қызметкері А.-ның оң көзінің астынан бір мәрте ұрып, аяғымен оң қолының білек тұсынан теуіп, соңғының  денсаулығына қауіпті емес күш қолданып, жеңіл зиян келтірген дене жарақатын салған.

Сотта сотталушы А. өзіне тағылған айыпты толықтай мойындауымен, жауапты оқиға болған жерде тексеру хаттамасымен, оған тіркелген фотокестелерімен және қылмыстық істің өзге де материалдарымен толық дәлелденді.

Сот үкімімен сотталушы А. Қазақстан Республикасының ҚК-нің 380-бабының 1-бөлігімен кінәлі деп танылып, оған 1 (бір) жыл 6 (алты) ай мерзімге бас бостандығынан шектеу жазасы тағайындалды.

Үкім заңды күшіне енген.