Әрбір перзент – тәңірдің ата-анасына берілген үлкен сыйы. Олар баласының өмірі жарқын, болашағы кемел болуы үшін әсте аянып қалмайды. Әрбір бала – жарық жұлдыз. Тек талантын танып, дер кезінде жарқырауына жәрдем берсек болғаны. Мерекеге орай талантымен көзге түскен бір топ бүлдіршінді назарларыңызға ұсынамыз. Ең бастысы, бұл кішкентайлардың «ұлтым» деп ұлылыққа ұмтылған, «елім» деп өрелі өнегесін танытатын білімді, дарынды ұл-қыздарға айналатынына сенім мол.

Бұл – Дархан Жомартұлы. «Ертөстік» бөбекжай-бақшасының тәрбиеленушісі. Жасы 5-те. Балабақшаны тәмамдап, мектеп қабырғасына аттанғалы тұрған бүлдіршін сурет салғанды, қолөнермен айналысқанды жаны сүйеді. Балабақша тәрбиеленушілері арасындағы ұйымдастырылған республикалық сурет байқауында І орын иеленген. Топ белсендісі болуымен қатар, рөл ойнаудың да шебері.

– Дарханға қандай рөл, кез келген образ ұсынсақ та, оны керемет алып шығады. Әртістік өнері де бар. Есте сақтау қабілеті де жақсы. Шығармашылық жұмыстарды жан-тәнімен орындайды. Өнер саласына бейімді болғандықтан, болашақта бір жұлдыз шығарына сенімдімін, – дейді бөбекжай-бақша меңгерушісі Айткүл Әбжалиева.