Бекеттерге рейд жүргізілді
Жұмада аудандық Төтенше жағдайлар, полиция, тұрғын үй коммуналдық жолаушылар көлігі және автомобиль жолдары және «Атамекен» облыстық кәсіпкерлер палатасының аудандық филиалы қызметкерлерімен бірлесіп кентте орналасқан автокөлікке газ құю бекеттерінде өрт қауіпсіздігі бойынша түсіндірме жұмыстарын жүргізді.
Төтенше жағдайлар бөлімінің бас маманы, азаматтық қорғау майоры Еркін Назарқұловтың ұйымдастыруымен кенттегі 11 газ құю бекеті араланды. Рұқсат етілмеген бекеттерде тұрмыстық газ баллондарына газ құюға болмайтыны, газ желісі ұйымдары мен газ толтыру пункттері газ толтыру алдында тұрмыстық баллондардың техникалық жарамдылығын тексеруге міндетті екені ескертіліп, арнайы дайындалған жадынамалар таратылды.
Егер газ құю бекетінде баллондарға пропан газын құюға жол берілсе, ҚР әкімшілік құқық бұзушылық туралы кодекстің 170-бабының 3-тармағына сәйкес, сұйытылған мұнай-газын өткізу тәртібінің талаптарын бұзғаны үшін 75 АЕК-тен 700 АЕК-ге дейін (218775 – 2041900 теңге) мөлшерінде айыппұл салынатыны ескертілді.
Ерсін ӘЛІБАЙ
