Ауданымыздағы елді мекен тұрғындары негізінен мал шаруашылығымен айналысады. Шаруаның бұл түрі жергілікті тұрғындардың қосалқы, кей жанұялардың негізгі күн көріс көздерін құрайды.

Ол азық қана емес бүгінгі күні нағыз табыс көзіне айналуда.

Нарықтағы еттің бағасы өскен сайын мал бағасының құны да көтеріліп, шаруашылықтың бұл түріне қызығушылық артуда.

Дегенмен кейбір адамдар мұндай табысқа бейнет арқылы емес, шаруаның қанша еңбегімен өсірген малын жасырын жымқыру арқылы қол жеткізуді көздейді.

Осы жылдың І тоқсанында аудан көлемінде 10 мал ұрлығы қылмысы тіркеліп, өткен жылдың осы мерзімімен салыстырғанда 43% көбейген (7).

27 бас мал ұрланып (9 жылқы, 17 сиыр, 1 қой), мал иелеріне 9,5 млн теңге көлемінде залал келген.

Елді мекендердегі пада немесе кезек арқылы бағудың тиісті дәрежеде ұйым­дастырылмауы, малдардың өз бе­­тінше өрісте жүрген жерінен ұрлануына оңтайлы сәт туғызуда.

Одан бөлек, қараусыз жүрген малдар автокөлік жолдарына шығып кетіп, жол көлік оқиғаларына да себеп болуда.

Құрметті аудан тұрғындары! Малдарыңызды қараусыз қалдыр­маңыздар.

Мал қоралардың толық, тиянақты жабылуына назар аударып, сақтық шараларын қолданыңыздар.

Сонымен қатар, малдарыңызды сырғалап, таңбалап, деректер базасына енгізілуін және құжаттарының сәйкестендірілуін қамтамасыз ету­леріңіз қажет.

Малыңыздың ұрланғаны белгілі болған немесе осындай күдік туған жағдайда дереу полиция органдарына (102 нөміріне) хабарласыңыз.