Мал ұрлығының алдын алу маңызды
Мемлекет басшысы Қасым-Жомарт Кемелұлы Тоқаев мал ұрлаушыларға жазаны күшейтуді тапсырған болатын. Өйткені, мал – ауыл халқының күн көрісі, нәпақа, берекесі. Ол азық қана емес бүгінгі күні нағыз табыс көзінің өзі. Осы орайда оңай жолмен олжалы болғысы келетіндердің де қатары артып келеді. Яғни, өзгенің өрісіндегі түлікке барымташылардың көз тігуі өршіп тұр.
Өткен жылдың ақпан айында Қылмыстық кодекске 188-1-бабы бойынша «мал ұрлығы» деген жаңа бап еңгізілген болатын. Онда ең ауыр жаза 12 жылға дейін бас бостандығынан айыру көзделген.
Не десек те, Абай атамыз «қазақтың міні-мал ұрлығы» деп өз заманында дөп басып айтса да, өкінішке орай, қылмыстың бұл түрі азаяр емес.
Қорыта айтқанда, ең біріншіден, ауылдық елді мекен тұрғындары малдарын сырғалап, таңбалап, құжаттарын ретке келтіруі қажет. Екіншіден, малдарды жайылымға қараусыз жібермей, падашы жалдау тиіс.
