Халықтың өмір сүру деңгейін жақсарту бірінші орында

«Nur Otan» партиясы біздің ауыл азаматтарының өмір сапасын жақсартуды жақтайды. Осы бағытта «Ауыл - ел бесігі» және «Құтты мекен» жобаларын іске асыру жалғасады. 2025 жылға қарай ауылдық инфрақұрылымды жаңғырту Қармақшы ауданының 53,8 мың тұрғынының өмір сүру сапасын жақсартады. Нәтижесінде аудан тұрғындары таза суға және сапалы жолдарға, әлеуметтік және инженерлік инфрақұрылымға қол жеткізеді.

Бұл туралы аудандық мәслихат депутаттығына үміткерлер Иіркөл ауылында сайлаушылармен кездесуде айтты. Кандидаттар партияның сайлауалды бағдарламасын үгіттеуде сайлаушы Мұғалла Әзбергенованың үйіне барды.

– Партияның үгіт жүргізу шарасы аясында сізбен жолығып, бағдарламаны таныстыруды жөн көріп отырған жайымыз бар. Сіз бұған дейін пошта саласында қызмет еттіңіз. Партияның жұмысы мен жеткен жетістігінен хабардарсыз деп ойлаймын. Дегенмен «Nur Otan» партиясы келер жылдан бастап ауқымды жоспарларды қолға алып отыр. Оның ішінде білім, денсаулық сақтау саласын көтеру, халықтың өмір сүру деңгейін жақсарту секілді бағдарламалар бірінші орында. Енді осы жоспардың іске асуына ықпал жасау үшін сізді партияға дауыс беруге шақырамыз, – деді үміткерлер.

Үміткерлерді жылы қабылдаған сайлаушы 10 қаңтарда партияны қолдап, дауыс беретінін айтты.