Белсенділер бас қосты

Жосалы кенті әкімшілігінің мәжіліс залында аудан жастары және зиялы қауым өкілдерімен кездесу өтті. Оған аудандық ішкі саясат бөлімінен, сондай-ақ әр сала бойынша белсенді жастар қатысты. Шараның мақсаты – өскелең ұрпақты адамгершілікке, әділеттілікке, ел мен жердің қадір-қасиетін ұғынуға тәрбиелеу.

Іс-шарада «Ұлт бірлігі – Қармақшы» ҚБ-нің төрағасы Шегебай Құндақбаев, аудандағы қоғамдық кеңестің төрайымы Гүлжауһар Раева, «Қармақшы таңы» газетінің бас редакторы Сәрсенкүл Райымбаева, аудандық жастар үйінің маманы Айбек Жұмахмет тәуелсіздіктің тұғыры жайында өз ойларын жеткізді. Аға буын өкілдері еріктіліктің қанмен келген қасиет екенін, қайырымды істің берекеге бастайтынын айтып, көпке қамқорлық танытып жүрген жастарға ризашылығын жеткізді.

– Әлем елдерінің кей жерлерінде неше түрлі қақтығыстар орын алуда. Тіпті тәуелсіздік жолында күресіп жатқан елдер де бар. Біз қазақ елі дүниежүзінде болып жатқан дүрбелең қақтығыстардан аманбыз. Бұл Елбасының сарабдал саясаты, даналығының арқасында болып отыр. Ұлт Көшбасшысының саясаты дұрыс болғандықтан осындай бейбіт заманда өмір сүрудеміз, – деп пікір білдірді жастар үйінің маманы Айбек Жұмахмет.

Жиын соңында ел бірлігі мен қоғамдық келісімді нығайтуға, гуманистік мұраттар мен еріктілер қозғалысының дамуына елеулі үлес қосып жүрген бірқатар белсенділерге ұйымдастырушылар атынан арнайы алғыс хаттар табысталды.