Сәпен АҢСАТОВ: "Тәуелсіздігіміз баянды болғай"

Тәуелсіздігімізді алғанымызға – 29 жыл. Тәуелсіздік бізге барлық сәнімен, салтанатымен, жасауымен үйге енген келін емес. Тәуелсіздік – ер-тұрманымен сыйға тартқан су шайқалмас боз жорға ат емес.

1991 жылы 16 желтоқсандағы салтанатты жиында заңғар жазушы, абыз ағамыз Әбіш Кекілбаев көпшілікке қарата:

– Бодандық бізді қандай сынаса, бостандық бізді одан да қатты сынайды, – деп еді.

Тәуелсіздік мемлекет тізгінін ұстаған қайраткерге де, қарапайым біз сияқты азаматтарға да үлкен сын, һәм жауапкершілік. Тәуелсіздікті туған қызыңдай мәпелей алсаң мәртебең мен мерейің. Тәуелсіздікті туған анаңдай қастерлей алсаң тілің мен діліңнің, салт-дүстүріңнің тұтастығы. Тәуелсіздік – шекарамыздың бүтіндігі, ұлттық жасампаздығымыздың кепілі. Барша жерлестерімді Тәуелсіздік мерекесімен шын жүректен құттықтаймын. Еліміздің тыныштығы, ел-халықтың ауызбірлігі мен ынтымағы баянды болғай. Тәуелсіздік күні құтты болсын.