Бүгінгі жағдайда бүкіл әлемде адамзаттың бейбіт өмір сүруіне және дамуына қандай да қауіп-қатерлер болса, солардың басында діни экстремизм мен терроризм тұр.

Осыған орай, Аудандық ардагерлер үйінде ішкі саясат бөлімінің мемлекеттік тапсырысы шеңберінде "Қармақшы аудандық ардагерлер кеңесі" қоғамдық бірлестігінің төрағасы Қ.Есдаулетовтың ұйымдастыруымен ардагерлер арасында "Дін саласындағы тұрақтылықты қамтамасыз ету мақсатында" дөңгелек үстел өтті.

Дөңгелек үстелге "Қармақшы ата" мешітінің бас имамы Жақсыбек Қажы Әбиұлы, Дін мәселелерін зерттеу орталығының Қармақшы аудандық бөлімшесінің теолог маманы Ж.Ысқақов қатысып тақырып төңірегінде қатысушыларға терең ақпарат бере алды.

Сөз барысында дінтанушылар қазіргі таңда тәуелсіз мемлекетімізді дамушы және дамыған елдерден ерекшелігі, ол – қоғамдағы діннің нығаюы мен елдегі діни ахуалдың тұрақты болуын, соңғы жылдары еліміздің діни ахуалына талдау жасау барысында, халқымыздың сексен пайызға жуығы асыл дініміз исламды ұстанып, дінге бет бұрып жатқандығы және олардың басым бөлігін жастар құрайтыны белгілі болғанын айтып өтті. Шара барысында дәстүрлі дінімізбен мүлдем үйлеспейтін кейбір сан алуан пікірлер мен ұстанымдар салдарынан туындайтын түрлі келеңсіз жәйіттер алаңдататынын тілге тиек етті.