Әлемді жайлаған індет кезінде медицина саласына көп күш түскені анық. Дәрігерлер бірнеше айлап жұмыста қалуға мәжбүр болды. Күндіз-түні жүздеген науқасқа ем-дом жасады. Міне, осы ақ халатты абзал жандардың еңбегін елеп Президент Қасым-Жомарт Тоқаев өз жолдауында алғысын білдірді. Одан бөлек, медицина саласында бірқатар түйткілді мәселелерге тоқталды.

Мемлекет басшысы өзінің мәлімдемесінде ең бірінші абзал жандардың жалақысы 2023 жылға дейін экономикадағы орташа жалақыдан екі есе жоғары болу керектігін айтты. Бұл өзгерістің медицина мамандарының жұмысына тың серпіліс берері анық. Індет белең алған кезеңде ауруханадағы төсек орынның тапшы болғаны рас. Міне, осындай қиын уақытта қалтқысыз қызмет ету үшін жыл соңына 13 жұқпалы аурулар ауруханасы салынатынын мәлімдеді. Бастапқы медициналық көмекті ұйымдастыру саласын дамытуда да бірқатар мәселе жоспарға қойылған. Оның ішінде шалғай ауылдарда сапалы әлі жедел көмекті ұйымдастыру. Бұл өз кезегінде науқастың денсаулығын сақтап қалуға, ауруды ушықтырмауға едәуір көмек болмақ. Сондай-ақ медицина саласында пандемия кезінде тапшы болған эпидемиолог, инфекционист, реаниматолог және кардиологтарды дайындау мәселесін қозғады. 2021 жылы "Аңсаған сәби" арнаулы бағдарламасын қосу да тапсырылды. Сонда "Эко" бағдарламасымен квота 7 мыңға дейін, яғни 7 есеге көбеймек.

Мемлекет басшысы Қасым-Жомарт Кемелұлы бүгінгі жолдауында саладағы біраз мәселені қозғады. Енді сол мәселелердің шешімін табу үшін Жолдауға қолдау білдіру аса маңызды.