Түлектердің туған жерге тартуы
Бұл күнде өскелең ұрпақтың көбі үлкен қалаға үлкен арманмен аттанып, сонда қалуды армандайды. Алайда, туған ауылы үшін бәріне даяр жастар да жоқ емес. Бұған мысал – Дауылкөл ауылдық округінің "93-тері". Олар балдай балғын шақтары мен өмірдің ең қызықты кезеңін осы ауылда өткізді. "Әркімнің туған жері – Мысыр шаһарындай" деп қазекем бекер айтпаған. Тұрмағамбет ауылы олардың жүрек түкпірінен орын алған құтты мекені.
Әні мен дәні қатар өрлеген ауыл қазіргі таңда қарқынды дамып келе жатыр. Ауылдың дамуы мен көркеюіне басшылықпен қатар тұрғындар да жәрдемдесуде. Кіндік қаны тамған жерінің көркеюіне өзіндік үлесті қосушылардың арасында жастар да бар. 1981 жылғы түлектер өздері білім алған мектебіне "Рәміздер топтамасын" сыйласа, 1991 жылы туған түлектер "Ойын алаңын" салды, ал 1982 жылғылар "Менің жүрегімде – Тұрмағамбет" тұғырын орнатқан. Осы орайда биыл бітіргеніне 10 жыл толатын ауыл жастары туған жеріне сыйлық ретінде үлкендерге арналған спорттық алаң тарту етті. Спорттық құрылғылармен толықтырылған алаңның аумағын қоршап, асфальттап игілікті іс істеген жастарға тұрғындар дән риза.– Осыдан 2-3 жыл бұрын ауылымызға тарту жасаймыз деп шештік. Сол уақыттан бері қаражат жинап, құрылысын бастадық. Қазір барлығы дайын, спортпен шынығамын деген жанға есік ашық. Жалпы бұл спорт алаңын салудағы басты мақсат – өлкеде саламатты өмір салтын қалыптастыру, – дейді Т.Ізтілеуов атындағы №29 мектепті 2010 жылғы бітірген түлектер.
2007-2008 жылдары 9-сыныпты бітірген 31 оқушы колледжде білім алған. Ал 22 түлек 2009-2010 жылдары 11-сыныпты тәмамадап, жоғары оқу орнында білімін шыңдады. Ел қамын ойлайтын азаматтарды тәрбиелеуде К.Қожабаева, Г.Жалғасбаева, К.Нұрмаханова және Н.Жаханова сынды ұстаздардың еңбегі мол.P.S.
Туған жердің төсінде шаңырағының түтінін түтетіп, еңбек етіп жүрген жандардың ауылға тартқан сыйы – көпке үлгі. Барлығы да шаруашылықтың бетке ұстар еңбеккерлері, ауылын сүйген азаматтар. "Саусақ бірікпей, ине ілікпес". Бұл – түлектердің ауызбіршілігі мен татулығының көрінісі.
Аслан НҰРАЗҒАЛИ
