Алайда санамызды «бірақ» деген сөз жегідей жеуде. Бүгінгі қоғамдық пікір екіге бөлінді. Көпбалалы ананы жазғырып, баланы қажетсіз етті кейбірі. Жыл сайын «көтергіш екенсің» деп тағы жекіді біреуі. Баланың бақыт екенін, Алланың қалауымен өмірге келерін білсек көпбалалы ананы неге кінәлаймыз?

Бала күнімде үйімізге қарама-қарсы тұрған жас отбасы есімде. 18 жасқа енді толғанда Толғанайды Шымкенттен көрші аға алып қашты. Алыстан келген соң артынан келер адамы болмады. Көнді, қалды. Арада біраз уақыт өтпей енесі о дүниелік болды. Көршілер «кесір келін» деп айдар тақты. Өзі көнбіс болса да ішкіш күйеуінің бабын тапты. Адам қылды. Бірақ жұрт қолын шошайта қарайтын. Жылда-жылда аяғы ауыр болып, босанатын. Жағдайы мәз болмаса да «әр бала өз несібесімен ғой» деп отыратын. Бірінен соң бірі ерген балалары анасының бақшада өсірген картоп, қияр, қызанағын сатып ақша тапты. Осылай жүріп тез ер жетті. Қазір келіншек 9 баланың анасы. Алдыңғы қатарлы ер жеткен ұлдары оқуын бітіріп, жақсы жерде қызмет атқарады. Бұрынғы кепе үйі зәулім үйге айналған. Бастысы – «еңбектің тәтті нанын» жеп отыр. Иә, бұл отбасының балалары жайында ауыр сөз естімейсің. Ортаңғы қызы мен ұлы мектепті алтынға бітіріп, грантқа оқуға түсті. Кішілері үздік оқушы. Мұнан біз не түйдік? Толғанай бар жақсысын аямаған асыл жан. Тағдырдың тауқыметіне мойымай бала үшін бәріне дайын болды. Парасатымен, ақылымен қиындықты жеңе білді. Бұл бір ғана мысал. Ал Толғанайдай балам деп баз кешіп жүргендер қаншама?

Аудан бойынша төрт баладан көп баланы өмірге әкелген аналар саны 780-ді құраса, алтын мен күміс алқа таққан, Батыр аналар – 1022. Демографияның өсуіне үлес қосқан бұл жандар қаншалықты қамқорлықта? Расымен де қазір сарыауыз балапандай мемлекетке ауыз ашатынымыз жасырын емес. «Біреу берсе, біз алсақ» деген ойдан да аулақ болған жөн болар еді. Әрине тағдырдың жазғаны сол дейміз. Бірақ оны өзіміз жасап алатынымыз өкінішті.

Қазір ғаламторда «челленджге» айналған қайырымдылық бар. Яки бір адам бір отбасына барып, керегін алып береді. Осылай бұл жақсылық екінші адамға көшеді. Айналады дейміз-ау, айналып та үлгерді. Мекемелер де қайырымдылыққа белсене атсалысуда. Жамағат та көпбалалы отбасыларына баспана сыйлады. Қуанышы мен қайғысы, қиындығы мен шаттығы қатар жүретін өмір-сынақта кімнің басынан не өтпейді? Сондай бір сәтте көңілге медеу, жанға демеу болатын қайырымды адамдардың жаныңа жалау болып, қолдағаны бір ғанибет.