Көрмені аудандық «Қармақшы таңы» газетінің бас редакторының міндетін уақытша атқарушы Сәрсенкүл Жаудатбекқызы ашты. Вьетнам соғысының ардагері Иса Бисенов құрметті қонақ болып, ақ батасын берді. Онан соң келген шеберлер, өз бұйымдарының мән-мағынасымен таныстырды. Ұйымдастырушыға алғысын айтып, сый тарту етті. Рухани, мәдени құндылыққа толы көрмені көргенде көз тояды. Қарапайым жүннің өзін түрлендіріп, түрлі бұйым жасаған. Заманауи орамалға жүннен өрнек түскенде, өзгеше бір керемет дүние болып шыға келген.

Жиында ерекше көзге түсіп, көпшілік назарын аударған – Ханыгүл Берденқұлова мен келіні Аида Ереханованың бұйымдары. Басқұр, шашақ бау шебері Ханыгүл апай өз білгенін келініне үйретіп, ата дәстүрді жалғаған. Келіні Аида өз ынтасы мен еңбегінің арқасында қолөнерді үйреніп, заманға сай түрлі бұйымды жасауды одан әрі дамытуда. Бүгінде ол қыз жасауы, құрақ көрпеше, жастық, тәсбих, сырға, білезік, сәукеле, қамзол, көзмоншақ секілді бұйымға тапсырыс қабылдайды.

– Көрме жоғары деңгейде өтіп жатыр. Қазақы нақыштағы дүниелерді көріп, жақсы әсер алудамын. Әлі де үйренерім көп. Біздің өнерімізге қолдау білдіріп, осындай жиынға шақырғанына қуаныштымын, – дейді жас шебер.

Талайды таңқалдырған қонақтың бірі – Жаңақорған ауданынан келген ҚР қолөнершілер одағының мүшесі, кәдесый, ағаш шебері Пахрадин Садықов. Ол –салт-дәстүрді, қолөнер мен тарихты үйлестіруші. Қолынан шыққан әрбір бұйымы тарихтан сыр шертеді. Қолы алтын шебер – сөзге де ұста. Тарихтан мәлімет келтіре отырып, құнды ақпаратпен бөлісті. Ұлттық құндылықты насихаттауға, қадір тұтуға кеңес берді. Өзінің көз майын тауысып жасаған, құны 15-20 мың теңге көлеміндегі біршама кәдесыйларды ұлт мәдениетіне байланысты сұрақтар қойып, оған дұрыс жауап бергендерге сыйлап отырды.

Аталған жиында қонақтардан өзге аудан мектептерінің технология пәнінің мұғалімдері де қатысып, өз қолынан шыққан шығармаларымен бөлісті. Шеберлер өзара пікір алмасып, керемет рухани кездесу болды. Шара соңында ұйымдастырушы Бақыткүл Райымбаева қатысушыларға алғыс хат табыстап, сый-сияпат үлестірді. Көрмеге арнайы келген қонақтар әрі қарай Қорқыт ата кешеніне қарай жол тартты.

Ұлттық құндылықты дәріптеп жүрген аға-әпкеміздің еңбектері ұшан-теңіз. Ұрпаққа үлгі болған жандар іздерінен еріп келе жатқан жас буынды көріп көңілі марқайды. Осындай тұлғалардың барында қазақ мұрасы әрі қарай өркендей бермек.