2025 жылы не өзгереді?
Күнтізбе ауысуына байланысты жаңа жылда біраз өзгеріс болады. Оның кейбірі – заңнама тәртібінде көзделген өзгерістер болса, кейбірі – былтырғы бастамалардың заңды жалғасы. Мәселен, айлық есептік көрсеткіш жыл санап өсіп отырады. Былтыр 3 692 теңге болса, биыл 1 АЕК 3 932 теңгеге тең. АЕК-тің әсері зейнетақы, жалақы, әлеуметтік жәрдемақыларға да әсер етеді.
Тағы бір өзгеріс – биылдан бастап жеке тұлғалардың декларация тапсырудан босатылуы. Қаржы министрі Мәди Тәкиевтің айтуынша, 8 млн азамат бұл міндеттен босатылуы мүмкін. Себеп – деректер базасының цифрлануы және қолма-қолсыз төлем жүйесінің дамуы. Дегенмен жеке кәсіпкерлер, мемлекеттік қызметкерлер, квазимемлекеттік сектор басшылары мен олардың жұбайлары декларация тапсыруды жалғастырады.
Жаңа салық кодексі 2025 жылдың шілдесіне дейін қабылданып, 2026 жылдың қаңтарынан бастап күшіне енеді. Негізінен мынадай өзгерістер болуы мүмкін:
- Салық пен төлемдер саны 20 пайызға қысқарады;
- Салық есептілігі көлемі 30 пайызға азаяды;
- Корпоративті табыс салығының негізгі мөлшерлемесі 20 пайыз деңгейінде қалады;
- Банктер мен ойын мекемелері үшін 20 пайызға көтеріледі;
- Өңдеуші өнеркәсіп үшін 10 пайызға төмендетіледі;
- Ауыл шаруашылығы өндірушілері үшін 3 пайыз болады.
Банк аралық QR-төлемдердің іске қосылуы да биылға жоспарланып отыр. Яғни пайдаланушылар сауда нүктесінде қай банктің терминалы тұрғанына қарамастан кез келген банктің мобилді қосымшасы арқылы QR-төлемді жүзеге асыра алады. Қазір бұл жұмысты Ұлттық төлем корпорациясы екінші деңгейлі банктермен бірлесе жүргізіп жатыр. Қызмет 2025 жылдың бірінші жартысында қолжетімді болмақ.
2025–2027 жылдарға арналған Ұлттық қордан республикалық бюджетке кепілдендірілген трансферт көлемі бекітілді:
- 2025 жылы – 2 трлн теңге;
- 2026 жылы – 2 трлн теңге;
- 2027 жылы – 2 трлн теңге.
Ұлттық қорға мұнай секторы ұйымдарынан түсетін түсімдер негізінде 2025–2027 жылдарға арналған мұнайдың кесімді бағасы белгіленді:
- 2025 жылы – барреліне 42,3 доллар;
- 2026 жылы – барреліне 41 доллар;
- 2027 жылы – барреліне 39,4 доллар.
1 қаңтардан бастап «Мемлекеттік сатып алулар туралы» жаңа заң күшіне енеді. Заң сатып алу үдерісі процедурасын оңтайландыруға, сатып алынған тауар, қызмет, жұмыс сапасын арттыруға, сатып алуға қатысушылардың жауапкершілігін күшейтуге, бәсекені дамытуға бағытталған. Заң 4 блоктан тұрады.
