Елімізде криптовалюта туралы заң жобасы әзірленіп жатыр
Келер жазда еліміздегі электронды ақша айналымына қатысты заң жобасы ұсынылуы мүмкін. Бұл туралы Қазақстанның блокчейн және криптовалюта қауымдастығының өкілдері хабарлады.
Қауымдастық шетелдің озық тәжірибелерін қолдану арқылы отандық экономикаға цифрлы валюта жүйесін енгізуді көздейді. Бүгінде заңды тұлғалар бірлестігіне медицина, қаржы, инжиниринг салаларында ойып тұрып орын алған белгілі қазақстандық компаниялар еніп отыр. Кеңеске қосылуға ниет білдірушілерден айына 30-дан астам өтініш түседі. Сондай-ақ бұл құрылым қысқа мерзім ішінде Астана халықаралық қаржы орталығымен ынтымақтастық туралы меморандумға қол қойды. Таяуда оңтүстік кореялық әріптестермен тәжірибе алмасып, келер көктемде жаңа ортақ жобалар қолға алынады. Спикерлер осылай дейді.
Дастан Қожабеков, «Қазақстан блокчейн және криптовалюта ассоциациясы» кеңесінің атқарушы директоры:
- Қазір әлемде жаңа блокчейн индустриясы дамып келеді. Көптеген мемлекеттер жаңа рынокты реттеуші ережелер енгізіп жатыр. Осы технологияның маңызы туралы Елбасы Нұрсұлтан Назарбаев XX Астана экономикалық форумында айтқан болатын. Осыған байланысты өткен жылдың аяғында блокчейн технологиясымен айналысатын компанияларды біріктіретін қазақстандық ассоциация құрдық.
24.kz
