Солтүстік Корея барлау жерсерігін ұшыруы мүмкін

Солтүстік Корея «Кванменсон-5» деп аталатын барлаушы жер серігін ұшыруға дайындалып жатыр.
Бұл туралы оңтүстіккореялық «Чунан Ильбо» газеті арнайы қызметтердің дерегіне сүйеніп хабарлады. Басылымның жазуынша, жаңа жерсерігі камера және байланыс құралдарымен жабдықталған. Алайда Оңтүстік Корея бас штабының өкілі Пхеньянның жерсерікті ұшыруға дайындалып жатқанын көрсететін нышандардың әзірге жоқ екенін мәлімдеді.
Айта кетейік, Солтүстік Корея өткен жылы ақпан айында Сохэ ғарыш айлағынан осындай жерсерігін ұшырған еді. Бұл әрекет Корей түбегіндегі жағдайдың бірден шиеленісуіне әкелген болатын. Ал өткен аптада БҰҰ Қауіпсіздік Кеңесі Пхеньянның қарашаның соңында баллистикалық зымыранды сынақтан өткізуіне қарсы жаңа санкциялар салды. Бірақ Пхеньян бұл шектеулерді елдің егемендігіне қауіп төндіретін «соғыс әрекеті» деп мәлімдеді.

24.kz