Есірткі секілді энергетикалық сусындар да адам денсаулығына зиянды.

Осыны түсінген Ұлыбритания үкіметі мұндай өнімдерді кәмелетке толмағандарға сатуға тыйым салмақ. Сарапшылардың айтуынша, оның құрамында қант пен кофеиннің мол болуы жасөспірімдердің денсаулығы мен мінез-құлқына кері әсер етеді. Семіздік пен тіс эмалінің бұзылуымен қатар энергетикалық сусындарды шамадан тыс ішкеннен ұйқылары бұзылып, бас ауруына әкеледі. Ресми мәлімет бойынша, Ұлыбританияда жасөспірімдер энергетиктерді еуропалық құрдастарынан 50 пайызға көп тұтынады екен. Бір литр өнімінде кофеиннің үлесі 150 милиграмнан асатын сусындарға тыйым салынады.

Заң күшіне енгеннен кейін, тұтынушының жасын анықтауға мүмкіндік болмайтындықтан, сауда автоматтарында энергетиктер сатылмайды. Бұл шектеу тек Англия аумағында күшіне енеді. Ал Уэльс, Шотландия және Солтүстік Ирландияда бұл мәселе ұлттық әкімшіліктерінің құзырында қалады. 

24.kz