Ауғанстанда Құрбан айт мейрамына орай атыс тоқтатылады
Ауғанстан президенті Ашраф Ғани алдағы Құрбан айт мейрамына орай елдегі «Талибан» радикалды қозғалысымен атысты 3 айға тоқтататыны туралы мәлімдеді.
Мемлекет басшысы тәліптер мұндай ұсынысыты оң қабылдайды деп сенетінін жеткізді. Бірақ лаңкестер президенттің мұндай ұсынысына әлі жауап берген жоқ. Дегенмен содырлар өз түрмелерінде ұстап отырған жүздеген адамды босататынын жариялады.
Ашраф гани, Ауғанстан президенті:
- Халық Құрбан айт мейрамын бейбіт жағдайда қарсы алу үшін атысты тоқтату туралы шешім қабылдадық. Ол қарашаның 20-сына дейін созылады. «Талибан» қозғалысы да бастаманы қолдайды деп үміттенеміз. Сондай-ақ біз бұл қозғалыс басшылығын бейбіт келіссөз жүргізуге шақырамыз.
Еске сала кетейік, Ауғанстан билігі бұған дейін Рамазан айының басталуы мен Ораза айт мейрамына орай атысты біржақты тоқтататынын жариялап, тәліптерді келіссөз жүргізуге шақырған еді. «Талибан» басшылығы да сол кезде үкімет жасақтарына қарсы 3 күн бойы ешқандай әрекет етпейтінін мәлімдеген. Бірақ бұл тәртіп лаңкестер тарапынан бірнеше рет бұзылды.
