Жапонияда теңіз жағасындағы үй 6,5 млн теңгеге сатылымға шықты
Фото: instagram.com/housesofjapan
Жапонияда теңіз жағалауындағы шағын үй бар болғаны 6,5 млн теңгеге сатылымға қойылды. Бұл туралы TrendWatching Telegram-арнасы жариялады, деп хабарлайды Egemen.kz.
Арнаның ақпаратынша, аталған сомаға сатып алушы екі қабатты, теңізге панорамалық көрінісі бар үйге ие болады. Сонымен қатар нысанда қайыққа арналған гараж, зат сақтауға арналған қосымша орын және шағын жеке ауласы бар екені көрсетілген.
Сатылым туралы хабарландыру фотосуреттермен бірге берілген.
Жылжымайтын мүлік Окиносима өңірінде орналасқан. Бұл – Жапонияның батысындағы, Симанэ префектурасына қарасты, Жапон теңізіндегі шалғай арал. Ол Оки аралдары архипелагының құрамына кіреді және ерекше табиғатымен, көне тарихымен, сондай-ақ дәстүрлі өмір салтымен танымал.
