Жапонияда алғашқы теңіз жаяу әскері бөлімшесі құрылды

Жапония ІІ дүниежүзілік соғыстан бері өзінің қорғаныс күштерін алғаш рет шұғыл әрекет ететін теңіз жаяу әскерімен толықтырды. Оның құрамы 1 жарым мың сарбаздан тұрады. Алдағы уақытта 3 мыңға жеткізу көзделген. Шұғыл әрекет ету жасақтары алдымен Кюсю аралына орналасып, кейін Окинава аралына көшеді. Бұл шара Аспанасты елінің Шығыс Қытай теңізіндегі даулы жерлерді жаулап алу қаупіне қарсы жүзеге асып отыр. Оның ішінде Қытай мен Жапония арасындағы Сенкаку аралын қорғау да бар. Еске сала кетейік, желтоқсан айында Жапония алғашқы ұшақ тасығыш кемесін жасауға ниетті екенін мәлімдеген. Бұл шара да елдің алыстағы аралдарды қорғаудың амалы. Томохиро Ямомото, Жапония қорғаныс министрінің орынбасары: - Жапонияны қоршап жатқан аумақтың қауіпсіздігі мен қорғанысына қатысты жағдай алаңдаушылық туғызып отыр. Сондықтан біздің аралдарды қорғау өзекті мәселе.