34 жастағы мұсылман жігіт Нью-Йорк қаласының әкімі болып сайланды
Нью-Йорк қаласының жаңа әкімін сайлау америкалықтар үшін ұлттық деңгейде назар аудартқан оқиғаның бірі болды. Көп күткен сайлаудың қорытындысы бойынша, ABC News арнасының дауыс беру нәтижелеріне жасаған талдауына сәйкес, 34 жастағы демократиялық социалист Зохран Мамдани қаланың келесі әкімі болып сайланды, деп жазады Egemen.kz.
Бастапқыда штат ассамблеясы мүшесінің қарапайым бастамасы ретінде басталған бұл науқан қысқа уақыт ішінде тарихи жеңістерге ұласты. Мамдани тәуелсіз кандидат ретінде қатысқан бұрынғы Нью-Йорк штатының губернаторы Эндрю Куомоны бастапқы сайлауда және негізгі сайлауда да жеңіп шықты.
Сейсенбі күні кешкі сағат 9:00-де сайлау учаскелері жабылды. Бұл сайлау қала тарихындағы ең жоғары дауыс беру белсенділігімен ерекшеленді. 2 миллионнан астам тұрғын дауыс беріп үлгергенін жазады әлемдік БАҚ.
Зохран Кваме Мамдани (Zohran Kwame Mamdani) 1991 жылдың 18 қазанында туған. Демократиялық партия мен Америка Демократиялық Социалистерінің мүшесі. 2021 жылдан бері Нью-Йорк штаты Ассамблеясының 36-шы округінен, яғни Куинс ауданының Астория бөлігінен сайланған депутат болып қызмет етіп келген.
