Франция Қытаймен Жібек жолы аясында ынтымақтастық құруға үміт артты
Қытай мен Еуропа жаңа «Жібек жолы» аясында бірлесіп жұмыс істей алады. Франция президенті Эммануэль Макрон аспанасты еліне жасаған сапары кезінде осылай деді.
Сонымен қатар ол ресми Бейжіңмен Еуроодақ арасында экономикалық ынтымақтастық артады деген үмітте. Өйткені Қытай тарапы инвестициялар мен сауда-саттық көлеміне жиі шектеу қойып келген еді. Ал «Бір белдеу, бір жол» жаңа экономикалық бастамасы Бейжіңнің бұрынғы байланыстарын жаңғыртуға бағытталған. Қытай Халық Республикасы Орталық және Шығыс Еуропаның 16 елімен ынтымақтастықты арттыру үшін 3 миллиард АҚШ долларын бөлмек. Бұл мемлекеттердің 11-і Еуроодаққа мүше.
Эммануэль Макрон, Франция президенті:
- Ежелгі Жібек жолы тек Қытайға ғана тиесілі емес. Бұл жолдар бірлесе қолданылуы тиіс. Егер де серіктестік негізінде жүзеге асса, Қытай жасап жатқан инфрақұрылымдық және мәдени жобалар Франция мен Еуропа үшін де маңызды деп ойлаймын.
