Никарагуада жаппай ереуілдерге түрткі болған әлеуметтік сақтандыру реформасы жасалмайтын болды.
Бұл туралы ел президенті Даниэль Ортега мәлім етті. Естеріңізге сала кетейік, Никарагуада үкіметтің әлеуметтік өтемақыны азайту жоспарына қарсы шерушілер бас көтерген еді. Бүгінге дейін наразылық шарасы кезінде 10 адам мерт болған. 88-і жарақат алды. Толқулар елдің бірқатар қаласында өтті. Сәрсенбі күні басталған бас көтеруге биліктің салықты көтеріп, зейнетақыны азайту туралы шешімі түрткі болған. Жаңа ережеге сәйкес, жұмыс істейтін азаматтар табысының 7 пайызын әлеуметтік сақтандыруға аударуы тиіс. Ал зейнетақы, шәкіртақы мен отбасылық жәрдемақы көлемі 5 пайызға азаяды. Айта кетейік, Никарагуа – әлемдегі кедей елдердің бірі. Бұл мемлекет жалпы ішкі өнім көлемі бойынша әлемде 168-орында тұр. Ал елдегі жұмыссыздық деңгейі – 8 пайыз.