Ереванда халық ереуілге шығып, 46 адам жарақат алды
Армения астанасы Ереван қаласында халық жаппай ереуілге шығып, тәртіп сақшыларымен қақтығысты.
Салдарынан 46 адам жарақат алды. Наразылық шарасын ұйымдастырған парламент депутаты Никол Пашинян да зардап шеккен. Бұл туралы «Рейтер» агенттігі хабарлады. Ереуілге бұрынғы президент Серж Саргсянның премьер-министр лауазымына ұсынылуы түрткі болды. Шаһар көшелеріне мыңдаған адам шықты. Салдарынан қала орталығындағы қозғалыс пен бірқатар станцияның жұмысы тоқтады. Полицейлер ереуілшілерге қарсы көз шағылыстыратын граната қолданған. Жергілікті билік бас көтергендердің бұл әрекетін заңсыз деп танып отыр.
Айта кетейік, 2015 жылы бұл мемлекетте реформа жүргізіліп, Армения парламенттік республикаға айналған еді. Реформадан кейінгі алғаш премьер-министр сайлауы бүгін өтуі тиіс. Басқарушы партия бұл лауазымға елді соңғы 10 жылда басқарған Серж Саргсянды ұсынып отыр.
